Վենեսուելայի նախագահ Նիկոլաս Մադուրոն բնակարան է նվիրել կնոջն այն բանից հետո, երբ վերջինս մանգո է նետել իր վրա: Ինչպես հաղորդում է CNN-ը, պետության ղեկավարը տունը հատկացրել է զանգվածային բնակարան ծրագրի շրջանակներում:
Միջադեպը տեղի է ունեցել ապրիլի 22-ին, Անսոատեգի նահանգում: Մարլենի Օլիվոն մանգո է նետել Մադուրոյի վրա, երբ նա նոր տրանսպորտային ցանցի բացման արարողության ժամանակ ավտոբուս է վարել: Ավտոբուսի ապակին բաց է եղել եւ մանգոն դիպել է հենց Մադուրոյի գլխին:
Նույն օրը Մադուրոն այդ մասին պատմել է պետական հեռուստատեսության եթերում եւ ցույց տվել միրգը, որի վրա գրված է եղել. «Եթե կարող ես, զանգիր ինձ»: Պարզվել է, որ երկրի նախագահին իր հեռախոսահամարը թողել է 54-ամյա մի կին, հաղորդում է Lenta-ն:
Նախագահը պատմել է, որ իր օգնականներ արդեն կապվել են Օլիվոյի հետ: «Նա տան խնդիր ուներ, եւ ես արդեն հավանություն եմ տվել նրան բնակարան հատկացնելու որոշմանը, որը նա կստանա «Մեծ առաքելություն՝ բնակարան» ծրագրի շրջանակներում»,-ասել է Մոդուրոն:
Իր հերթին բնակարանի սեփականատեր դարձած կինը հայտարարել է, որ ինքը մանգոն նետել է ոչ չար մտադրությամբ: «Ես թուղթ չունեի այդ պահին եւ նետեցի այն, ինչ կար ձեռքիս տակ: Սեփական բնակարան ունենալն իմ երազանքն էր»,-ասել է նա:
