«Հիմնադիր խորհրդարանի» կալանավորված անդամներից Գեորգ Սաֆարյանը շարունակում է հացադուլը, առողջական վիճակը բավարար է: Այս մասին NEWS.am-ի թղթակցի հետ զրույցում ասաց փաստաբաններից Հայկ Գրիգորյանը:
Նա նշեց, որ քանի որ ոչ աշխատանքային օրեր են եղել, իրենք հնարավորություն չեն ունեցել տեսակցելու իրենց պաշտպանյալների հետ: Մյուս շաբաթ կանդրադառնան իրենց գործողություններին, Վճռաբեկ դատարան բողոք կներկայացնելուն:
«Հիմնադիր խորհրդարանի» կալանավորված անդամների փաստաբաններից Գեւորգ Դավթյանն էլ NEWS.am-ի թղթակցի հետ զրույցում ասաց, որ հավանական է, որ ՀԽ անդամներին ազատեն: «Իրենց նպատակը ապրիլի 24-ին նրանց արգելելն էր որեւէ գործողություն անել, որոշ ժամանակ անց հնարավոր է իրենց ազատ արձակեն, ոչ թե քրգործը կարճեն, այլ ուղղակի կալանքից հանեն: Այս կարծիքը շատ տարածված է նաեւ հասարակության մեջ, լրատվամիջոցներում, հնարավոր է լինի, հնարավոր է նաեւ դրա հակազդեցությունը լինի եւ ազատ չարձակեն»,-ասաց փաստաբանը:
Ավելի վաղ NEWS.am-ը հայտնել էր, որ «100-ամյակն առանց ռեժիմի» շարժումն ապրիլի 7-ին հայտարարել է, որ առավոտյան ժամը ժամը 6:35-ի սահմաններում Հիմնադիր խորհրդարանի շենք են ներկայացել իրավապահ մարմինների շուրջ երկու տասնյակ աշխատակիցներ եւ խուզարկություն են իրականացնում: Խուզարկություններ են անցկացվել նաեւ ՀԽ անդամների տներում, որից հետո բերման են ենթարկվել Ժիրայր Սեֆիլյանը, Վարուժան Ավետիսյանը, Պավել Մանուկյանը, Հայկական վերածնունդի Լիբանանյան ներկայացուցիչ Թորոս Սեֆիլյանը (Ժիրայր Սեֆիլյանի եղբայր), Հովհաննես Ղազարյանը, Արամ Հակոբյանը, Գեւորգ Սաֆարյանը, Գարեգին Չուքասզյանը: Ապրիլի 9-ին նրանցից 5-ին կալանավորվել են: Իսկ Արամ Հակոբյանի դեպքում կալանքի փոխարեն ընտրվել է խափանման միջոց գրավը:
Իր հերթին ՀՀ Քննչական կոմիտեն հաղորդագրություն է տարածել, որում ասվում է, որ ՀՀ ազգային անվտանգության ծառայության եւ ՀՀ քննչական կոմիետի համատեղ ձեռնարկած միջոցառումների արդյունքում կանխվել է 2015թ. ապրիլի 24-ին հրապարակային միջոցառումների անցկացման վայրերում զանգվածային անկարգությունների կազմակերպումը: