Նյու Յորքի քաղաքապետ Բիլ դե Բլազիոն ելույթ է ունեցել Հայոց ցեղասպանության 100-րդ տարելիցի կապակցությամբ։
«Այսօր մենք հիշում ենք Մեծ Եղեռնը եւ հարգանքի տուրք մատուցում 100 տարի առաջ տեղի ունեցած Հայոց ցեղասպանության զոհերին, միլիոնից ավելի հայեր սպանվեցին, բռնաբարվեցին եւ տեղահանվեցին կառավարության հրամանով»,- ասվում է հայտարարության մեջ։
Նրա խոսքով, Նյու Յորքում եւ այլուր ապրող հայերի համար պատմական վերքը բարդանում է Թուրքիայի ժխտողական քաղաքականության պատճառով։ «Թուրքերի նոր սերնդի խիզախությունը, որոնք մարտահրավեր են նետում այդ ողբերգությունը ժխտող երկրին, հուսադրող քայլ է՝ արդարության եւ հաշտեցման ճանապարհին։ Կրոնական անհանդուրժողականության այսօրվա աճի պայմաններում մենք պետք է օգտագործենք այդ հանդիսավոր առիթը, որ մտածենք անցյալի մասին եւ դիմագրավենք խտրականությանը ներկայում»,- ասել է Դե Բլազիոն։