ԱՄՆ-ի Եվրոպայի անվտանգության եւ համագործակցության Հելսինկիի Հանձնաժողովի նախաձեռնությամբ ԱՄՆ-ի Կոնգրեսում կայացել է «Հայոց ցեղասպանությունն ու Արդարության 100-ամյա անպատասխան պահանջը» թեմայով լսում՝ Հելսինկիի հանձնաժողովի նախագահ, հանրապետական սենատոր Քրիսթոֆեր Սմիթի գլխավորությամբ։
«Ամերիկայի ձայնի» փոխանցմամբ, Քննարկմանը մասնակցել են թուրք պատմաբան Թաներ Աքչամը, ԱՄՆ Հայ դատի հանձնախմբի նախագահ Քեն Խաչիկյանը, Ամերիկայի հայկական համագումարի հոգաբարձուների խորհրդի անդամ Վան Քրիքորյանը, Թաֆթս համալսարանի պրոֆեսոր Էլիզաբեթ Փրոդրումոն։
«Այս լսումը ոչ թե ուղղված է Թուրքիայի դեմ, այլ, հակառկը, այն սատարում է թուրք ժողովրդին, որը տասնամյակներ շարունակ փորձում է ընդդիմանալ պետության կողմից տարվող ժխտողականության քարոզչությանը»,- ասել է հանրապետական սենատոր Սմիթը։ Վերջինիս խոսքով, ԱՄՆ արտաքին քաղաքականությունը պետք է անկախ լինի։ «Մենք պետք է կարողանանք նայել թուրքերի աչքերի մեջ եւ ասենք, այո մենք ընկերներ են, դաշնակիցներ ենք, բայց Հայոց ցեղասպանությունը պետք է ընդունվի եւ հաջորդ սերունդները պետք է սովորեն ճշմարիտ պատմությունը»։ Նա հիասթափեցնող է անվանել Օբամայի կողմից «ցեղասպանություն» բառը չարտասանելը։
Թաներ Աքչամն իր հերթին նշել է, թե ցեղասպանության ճանաչումն առաջին հերթին կարեւոր է թուրք ժողովրդի համար։ «Թուրքիան այժմ աշխարհին է ներկայանում ժխտողական դեմքով, մինչդեռ կա այլ Թուրքիա, որի քաղաքացիները պատրաստ են ընդունել սեփական պատմությունը եւ ձերբազատվել անցյալի սեւ բծից։»,- նշել է նա։
Լսումներին ներկա է եղել նաեւ ԱՄՆ-ում Հայաստանի դեսպան Տիգրան Սարգսյանը։
