Բրյուսելի քաղաքային ժողովի 3 պատգամավոր ապրիլի 24-ին «խանգարել են» Հայոց ցեղասպանության զոհերի հիշատակը հարգող լռության մեկ րոպեն։ Կամ առնվազն դա այդպես է բացատրել թուրք լրագրող Սելիմ Էրյամանը, որը այդ թեմային անդրադարձել էր Zaman Belcika պարբերականում, տեղեկացնում է բելգիական Le Soir թերթը։

Պատգամավորներ Շեւքեթ Թեմիզը, Քոյունչու Հասանը եւ Էմին Օզքարան, տեսնելով, որ հայտնվել են մամուլի էջերում, հղումը տեղադրել էին սոցցանցերում։ Էրյամանը մասնավորապես գրում է, որ այդ 3 պատգամավորների լոբբինգի շնորհիվ խորհրդարանի նախագահը չի օգտագործել ցեղասպանություն եզրը՝ առաջարկելով մեկ րոպե լռությամբ հարգել ոչ թե հայերի, այլ  Առաջին համաշխարհային պատերազմի տարիներին զոհվածների հիշատակը։

Իրականում իրավիճակը ավելի խրթին է, գրում  է թերթը։ Իրականում մեկ րոպե լռությամբ հարգանքի տուրք մատուցելու առաջարկն արել է պատգամավոր Զոե Ժենոն։  Պատգամավորներից ոչ մեկը դեմ չէր, բացի նշված երեքից։ Չնայած խանգարելու նրանց փորձերին՝ լռության րոպեն հայտարարվեց, եւ նրանք ստիպված եղան լքել դահլիճը՝ իրենց խմբակցությունը անհարմար վիճակի մեջ դնելով։

Խմբակցության իրենց գործընկերների արարքի տհաճ ազդեցությունը փորձել է շտկել քաղաքային խորհրդի խոսնակ Շառլ Պիկեն։ Նա հայտարարեց, որ յուրաքանչյուրը, ըստ հայեցողության, մեկ րոպե լռությամբ կարող է հարգել ցեղասպանության կամ Միջերկրական ծովում զոհված միգրանտների հիշատակը։ Այդուհանդերձ, Զոե Ժանոն դատապարտեց այդ որոշումը՝ որակելով այն իբրեւ հաշտվողական։