Այս պահին Լեռնային Ղարաբաղի հակամարտ կողմերի համար կանխամտածված մեծամասշտաբ պատերազմի հիմքեր չկան, սակայն անհանգստության լուրջ պատճառ կա հնարավոր չկանխամտածված էսկալացիայի կապակցությամբ։ Այդ մասին առցանց մամուլի ասուլիս ժամանակ հայտարարել է Լոնդոնի արեւելյան եւ աֆրիկյան հետազոտությունների դպրոցին կից ժամանակակից Կենտրոնական Ասիայի եւ Կովկասի կենտրոնի գիտաշխատող Լոուրենս Բրոյերսը՝ անդրադառնալով NEWS.am-ի թղթակցի՝ Ադրբեջանի կողմից  հրադադարի ռեժիմի խախտման դեպքում հնարավոր մեծամասշտաբ պատերազմի բռնկման վերաբերյալ հարցին։

Նրա խոսքով՝ ԵՀԱԿ գործող նախագահի անձնական ներկայացուցչի մանդատը խիստ սահմանափակ է։  «Մանդատում են դեսպան Կասպշիկը եւ 5 դաշտային օգնականներ, որոնք պետք է կողմերին զգուշացնեն իրենց տեղաշարժի մասին։ Համեմատեք դա Վրաստանում ԵՄ մոնիտորինգային առաքելության վերահսկողության տակ գտնվող 200 դիտորդների եւ 3 դաշտային ծառայությունների հետ։ Այսօր առաջվա պես հայ եւ ադրբեջանցի հրամանատարների կամ ՊՆ-ների միջեւ  անմիջական  կապ չկա,  եւ  համապատասխանաբար իրավիճակը տեղերում կարող է հանգեցնել սխալ ընկալման, ոչ ադեկվատ արձագանքի եւ չկանխամտածված էսկալացիայի։