Լեռնային Ղարաբաղի ժողովուրդն ապացուցել է, որ վաստակել է ինքնորոշման եւ անկախության իր իրավունքը, եւ որ կարող է ինքնուրույն կառավարել իր երկրը։ Այս մասին NEWS.am-ի թղթակցի հետ զրույցում ասաց ԱՄՆ 28-րդ նախագահ Վուդրո Վիլսոնի ծոռ, «Վուդրո Վիլսոնի ժառանգություն» հիմնադրամի նախագահ Դոնալդ Վիլսոն Բուշը։

«Կա նաեւ լեգիտիմություն, որպեսզի այդ ազգը ներկայացվի ՄԱԿ-ում։ Սակայն այդ հարցի շուրջ պետք է փոխհամաձայնության գալ։ Իսկ ներկա պահին մյուս մեծ ազգերը այդ երկխոսության համար հնարավորություններ չեն առաջարկում»,- շարունակեց նա։

Անդրադառնալով  հարցին, թե  չի՞ վախենում արդյոք Լեռնային Ղարաբաղ այցելության պատճառով հայտնվել Ադրբեջանի սեւ ցուցակում, Վուդրո Վիլսոնի ծոռը նշեց. «Ո՛չ, քանի որ ես չեմ սիրում մարդկանց, որոնք փորձում են իշխել մյուսների վրա։ Ես հավատում եմ ազգերի իրավահավասարությանը։ Ազգերի միջեւ պետք է երկխոսություն լինի։ Մենք պետք է մտնենք այդ նոր դարաշրջան, որը կգործի համաձայն ազգ-պետության Վեսթֆալյան համակարգի. որոշ ազգերի համար դա շահավետ կլինի, որոշների համար՝ ոչ»։ 

Նրա խոսքով Լեռնային Ղարաբաղը նոր միջազգային համակարգ ներմուծելու հնարավորություն է, որից կարող են օգտվել փոքր պետությունները։ «Ես տեսա, որ Լեռնային Ղարաբաղի կառավարությունը նորմալ եւ լիակատար գործում է։ Նախագահին ընտրում են արդեն 4-րդ անգամ։ Ես հասկացա, որ Լեռնային Ղարաբաղն ավելի հին պատմություն ունի, քան իմ Վիրջինիա քաղաքը, որտեղ ես ծնվել եմ մեծացել եմ»,- հավելեց Դոնալդ Վիլսոն Բուշը։