Հայոց ցեղասպանության 100-ամյակի օրերին ԵԽԽՎ-ում զոհերի հիշատակը հարգելը կարեւորագույն իրադարձություն էր։ Այս մասին ապրիլի 27-ին Երեւանում ՀՀ արտգործնախարար Էդվարդ Նալբանդյանի հետ ունեցած համատեղ մամուլի ասուլիսի ժամանակ հայտարարեց Բելգիայի արտգործնախարար Դիդիե Ռեյնդերսը։
Նրա խոսքով՝ Բելգիան այդ կապակցությամբ իր խոսքն ասելու առիթ արդեն ունեցել է։ «Մասնավորապես Բելգիան դիմել է Թուրքիայի իշխանություններին՝ կոչ անելով Հայոց ցեղասպանության հարցում հանդես գալ նախաձեռնությամբ։ Ես կցանկանայի հիշեցնել, որ ԵԽԽՎ-ում մենք ցուցահանդես ենք բացել, եւ կազմակերպության նախագահը ներկա է եղել հիշատակի արարողություններին։ Ես իմ պարտքն եմ համարել նաեւ այցելել Ծիծեռնակաբերդ հուշահամալիրը, որպեսզի մեր խորհրդարանի՝ Սենատի կողմից աջակցություն հայտնեմ հայ ժողովրդին»,- նշեց Ռեյնդերսը։ Բելգիայի արտգործնախարարը հայտնեց, որ մայիսի 19-ին Բելգիայում ԵՄ շրջանակներում նախարարական ժողով կկայանա, որտեղ ռասիզմի եւ խտրականության դեմ պայքարի տարբեր խնդիրներ կքննարկվեն։