Հայաստանում բանկերի կողմից վարկավորման եւ ավանդների ներգրավման նվազումը պայմանավորված է գոյություն ունեցող ռիսկերով: Այս մասին NEWS.am-ի թղթակցի հետ զրույցում ասաց ԲՀԿ-ական պատգամավոր Միքայել Մելքումյանը:
Նա շեշտեց, որ բանկերը բիզնես կառույցներ են, գնահատում են իրենց ռիսկերը եւ գիտեն, որ այս փուլում երկարատեւ վարկ տալը պրոբլեմատիկ է, ուստի զերծ են մնում վարկ տալուց:
Պատգամավորը շեշտեց, որ վարկավորման եւ ավանդների ներգրավման իջեցումը պայմանավորված է դեկտեմբերին ռուսաստանյան գործընթացների հետ: Միքայել Մելքումյանը նկատեց, որ շատ ռիսկային է, երբ վարկ ես տալիս, սակայն հավատացած չես, որ այդ բիզնեսը հաջողվելու է, մյուս կողմից էլ՝ գրավով բեռնվելն էլ է վտանգավոր, գրավի արժեքը տարեցտարի կարող է իջնել, բանկերի խոշորացման ծրագրի նպատակներից մեկն էլ հենց հիվանդ գրավադրված ակտիվներով օժտված բանկերին «լավացնելն է»:
Անդրադառնալով ապրիլի 24-ի հետ կապված դրամի հնարավոր արժեւորմանը, պատգամավորն ասաց, որ ենթադրվում էր, որ մարդկանց հոսքի հետ կապված, դրամը կարժեւրովի: Բայց Միքայել Մելքումյանը նշեց, որ դրամը կարժեւորվի այն դեպքում, երբ տնտեսական ակտիվության լուրջ աճ ունենանք, իսկ այս տարի լինելու է ավելի ցածր ակտիվության տարի:
