Անցած հանգստյան օրերին Ռուսաստանի ԱԴԾ սահմանապահ վարչության աշխատակիցները հայ-իրանական սահմանին ոչ սովարական սահմանախախտի են ձերբակալել:
Ինչպես հաղորդում է ՀՀ-ում Ռուսաստանի ԱԴԾ սահմանապահ վարչության մամուլի ծառայությունը, ապրիլի 25-ին առավոտյան ժամը 10-ի սահմաններում, տեղի բնակիչներից տեղեկատվություն է ստացվել, որ անհայտ անձը փորձում է Իրանի կողմից անցնել Արաքս գետը:
Մի քանի րոպե անց սահմանապահների «ահազանգի խումբը» հայտնաբերել ու ձերբակալել է սահմանախախտին:
Ձերբակալվածը հայտարարել է, որ ինքը Իրանի քաղաքացի 23-ամյա Ս.-ն է, զինվորական: Նա նշել է, որ ապօրինի պետական սահմանը հատելու պատճառը ծառայակցի հետ կրոնական հողի վրա ի հայտ եկած տարաձայնություններն են եղել: Ձերբակալվածն ասել է, որ ինքը քրիստոնեություն է դավանում:
Ներկայումս սահմանախախտը փոխանցվել է Հայաստանի ԱԱԾ-ին՝ պարզելու տեղի ունեցածի հանգամանքները:
Սահմանախախտման դեպքի մասին հայտնած տեղի բնակիչը կպարգեւատրվի Հայաստանում ՌԴ ԱԴԾ սահմանապահ վարչության ղեկավարության կողմից: