ՀԱՅԲԻԶՆԵՍԲԱՆԿԸ, կարեւորելով Ցեղասպանության 100-ամյա տարելիցի կապակցությամբ հայտնի հայրերի այցը Հայաստան, նախաձեռնել էր խառը մենամարտերի երեք վարկածներով աշխարհի չեմպիոն Գեղարդ Մուսասիի (Մովսեսյան) այցը Երեւան, որի կապակցությամբ էլ Բանկի աշխատակիցները ս.թ. ապրիլի 23-ի գիշերը հանդիսավոր կերպով  «Զվարթնոց» միջազգային օդանավակայանում դիմավորեցին Գեղարդին եւ նրա եղբորը՝ Գեւիկ Մուսասիին:

Գեղարդը երկար տարիներ է համագործակցում է ՀԱՅԲԻԶՆԵՍԲԱՆԿԻ հետ՝ օգտվելով հայաստանյան առաջատար Բանկի կողմից մատուցվող ժամանակակից ծառայություններից:

ՀԱՅԲԻԶՆԵՍԲԱՆԿՆ իր Գլխամասային գրասենյակի նիստերի դահլիճում կազմակերպեց Մովսեսյան եղբայրների հանդիպումը լրագրողների հետ, որոնք հետաքրքրված էին չեմպիոնի գալուստով եւ անելիքներով: Հարցուպատասխանի ընթացքում Գեղարդ Մուսասին իր դրական զգացողությունները կիսեց ներկաների հետ, որոնք կապված էին Հայաստան գալու հետ, ներկայացրեց այցի բուն նպատակը՝ կապված Ցեղասպանության զոհերի հիշատակը հարգելու եւ իր դերակատարության հետ, ինչպես նաեւ խոսեց առաջիկա մենամարտերի մասին՝ գնահատելով սեփական եւ հակառակորդի հնարավորությունները:

Երեւանում լինելու ընթացքում Մուսասի եղբայրները ՀԱՅԲԻԶՆԵՍԲԱՆԿԻ աշխատակիցների ուղեկցությամբ այցելեցին Հայոց Ցեղասպանության զոհերի հիշատակը հավերժացնող հուշահամալիր, որտեղ լռությամբ հարգեցին անմեղ զոհերի հիշատակը: Նրանք շրջեցին հուշահամալիրի տարածքում եւ ծանոթացան խորհրդանշական կառույցների պատմությանը:

Նպատակային այցից տպավորված եւ ոգեշնչված՝ ապրիլի 25-ին աշխարհահռչակ խառնամարտիկը մեկնեց Ամստերդամ պատրաստվելու սպասվող մենամարտին:

Հիշեցնենք, որ ներկայում Գեղարդ Մուսասին հանդես է գալիս «Ultimate Fighting Championship» (UFC) կազմակերպության միջինքաշային դիվիզիայում եւ ըստ վերջինիս պաշտոնական ցուցակավորումների՝ միջինքաշային կարգի վարկանշային աղյուսակում 7-րդն է։