«Նաիրիտ» գործարանի ներկա և նախկին աշխատակիցները վարչապետ Հովիկ Աբրահամյանի խոստացած մեկ ամսվա աշխատավարձը կստանան վաղը` ապրիլի 28-ին: Այս մասին այսօր` ապրիլի 27-ին, NEWS.am-ի հետ զրույցում ասաց «Նաիրիտ» գործարանի մամուլի նախկին խոսնակ Անուշ Հարությունյանը:
«Մեկ ամսվա աշխատավարձը դեռ չեն վճարել, բայց, ամենայն հավանականությամբ, վաղը նաիրիտցիները կստանան: Եթե վաղն էլ չլինի, մինչև ապրիլի վերջ անպայման կստանան»,-ասաց Անուշ Հարությունյանը:
Հարությունյանը տեղեկացրեց, որ մայիսի 1-ին՝ Աշխատավորների միջազգային օրը նաիրտցիները բողոքի երթ կանցկացնեն:
Նշենք, որ Ավելի վաղ NEWS.am-ը հաղորդել էր, որ ապրիլի 17-ին, նաիրիտցիների հետ հանդիպմանը վարչապետ Հովիկ Աբրահամյանը խոստացել էր ապրիլի 27-ին վճարել մեկ ամսվա աշխատավարձը եւ պարտքի մարման ժամանակացույց էր ներկայացրել, ըստ որի, աշխատանքից ազատված նաիրիտցիները 2 ամիսը մեկ աշխատավարձ կստանան մինչեւ պարտքն ամբողջությամբ կմարվի:
Հիշեցնենք, որ հարկադիր պարապուրդի մատնված՝ «Նաիրիտ» գործարանի նախկին աշխատակիցների՝ 18-24 ամսվա աշխատավարձերի պարտքը կազմում է մոտ 15 մլն դոլար: Նրանք բազմիցս հավաքվել են Կառավարության եւ նախագահականի մոտ՝ պահանջելով իրենց խնդիրների լուծում: