Ամերիկյան Օրեգոնի նահանգում Sweet Cakes by Melissa հրուշակարանի սեփականատերերին տուգանել են 135 հազար դոլարով այն բանի համար, որ նրանք հրաժարվել են տորթ թխել գեյ-հարսանիքի համար: Այդ գումարը կուղղվի լեսհուհի զույգի բարոյական վնասի փոխհատուցմանը:
Աարոն եւ Մելիսա Քլայններին տորթ թխելու պատվերը Ռեյչել եւ Լաուրել Բոումեն-Քրայերները տվել են 2013 թվականին, սակայն հրուշակարանի սեփականատերերը հրաժարվել են ընդունել պատվերը՝ հայտարարելով, որ իրենց որոշումը պայմանավորված է իրենց կրոնական համոզմունքներով:
Ինչպես հաղորդում է The Independent-ը, Քլայնները խախտել են խտրականության դեմ պայքարի օրենքը, որն արգելում է, մասնավորապես, հրաժարվել սպասարկումից ռասայական, սեռական, տարիքային, կրոնական եւ այլ դրդապատճառներով:
Երբ մամուլում հայտնվել է Քլայններին տուգանելու տեղեկությունը, GoFundMe կայքում մեկնարկել է ի պաշտպանություն նրանց արշավը: Կարճ ժամանակում համացանցի օգտատերերը հրուշակարանի սեփականատերերի համար 100 հազար դոլար գումար են հանգանակել: Սակայն կայքի ղեկավարությունը դադարեցրել է միջոցների հավաքումը՝ համարելով, որ արշավի նպատակներն անօրինական են:
