Ապրիլի 27-ին Սպենդիարյանի անվան Օպերայի եւ բալետի ազգային ակադեմիական թատրոնում, «Երեւանյան հեռանկարներ» փառատոնի շրջանակում, կայացավ աշխարհահռչակ օպերային երգչուհի, լավագույն դրամատիկ սոպրանո Մարիա Գուլեգինայի համերգը: Աշխարհի առաջատար թատրոնների Մետրոպոլիտեն օպերայի, Լա Սկալայի, Քովենթ Գարդենի, Վիեննայի օպերայի Պրիմադոննան բեմ բարձրացավ սեւ զգեստով՝ այդպիսով հարգելով 1915 թվականի Հայոց ցեղասպանության զոհերի հիշատակը (ֆոտոռեպորտաժ):
Բուռն ծափահարությունների ներքո Գուլեգինան կատարեց Վերդիի «Դիմակահանդես» օպերայից «Morro ma prima in grazia» արիան:
Դիրիժոր Էդուարդ Թոփչյանի ղեկավարությամբ հնչեցին նաեւ պարտիաներ Ջակոմո Պուչինիի եւ Ումբերտո Ջորդանոյի օպերաներից:
Ունկնդրին մեծ հաճույք պատճառեց նաեւ լիրիկական տենոր Հովհաննես Այվազյանի հետ Գուլեգինայի ինքնատիպ դուետը:
Համերգն ավարտվեց օպերային երգչուհու կատարմամբ Կոմիտասի «Կռունկ»-ը, որը ներկաներից ոչ մեկին անտարբեր չթողեց: