Ռուսաստանի նախագահ Վլադիմիր Պուտինը տեղյակ է Հայոց ցեղասպանության մասին իր ելույթին Թուրքիայի նախագահ Ռեջեփ Թայիփ Էրդողանի արձագանքի մասին։ Այդ մասին հայտնել է Պուտինի մամուլի քարտուղար Դմիտրի Պեսկովը, հաղորդում է РБК-ն։
«Այսօրվա այլ տեղեկատվության հետ նախագահին զեկուցել են այդ մասին»,- ասել է Պեսկովը։
Հարցին, թե հնարավոր է՝ Էրդողանի արտահայտությունն ազդի ռուս-թուրքական հարաբերությունների վրա, բացասաբար անդրադառնա «Թուրքական հոսք» նախագծի վրա, Պեսկովը բացասական պատասխան է տվել. «Ոչ։ Մենք արդեն ասել ենք, որ մեր բազմակողմ համագործակցության հետագա զարգացումը մեզ համար գերակա է։ Տվյալ դեպքում հուսով ենք, որ հարաբերությունները նույն հետեւողականությամբ կզարգանան, ինչպես զարգացել են մինչ օրս»,- ասել է նա։
Նշենք, որ Թուրքիայի նախագահ Ռեջեփ Թայիփ Էրդողանը Ռուսաստանի նախագահ Վլադիմիր Պուտինին նախատել էր այն բանի համար, որ վերջինը 1915 թվականի իրադարձությունները Հայոց ցեղասպանություն է կոչել: «Առաջին անգամը չէ, որ Ռուսաստանն այդ հարցի շուրջ ցեղասպանություն բառն է օգտագործում: Չափազանց վշտացած եմ, որ Պուտինը դիմեց այդ քայլին: Այն, ինչ տեղի է ունենում Ուկրաինայում եւ Ղրիմում, անհերքելի է: Ցեղասպանություն բառն օգտագործելուց առաջ նրանք պետք է նախ պարզաբանեն, թե ինչ է տեղի ունենում այնտեղ»,- ասել էր Էրդողանը։
Ավելի վաղ քննադատությամբ հանդես էր եկել Թուրքիայի ԱԳՆ-ն։
