Շիրակի մարզում դանակահարված հոր եւ դստեր առողջական վիճակը բավարար է, նրանք դեռ մեկ շաբաթ էլ կմնան հիվանդանոցում: Այս մասին NEWS.am-ի թղթակցի հետ զրույցում ասաց Գյումրիի հիվանդանոցի տնօրեն Արմեն Իսահակյանը:
Նա նշեց, որ կնոջ մոտ վնասվածքները ավելի բարդ են, իսկ հոր մոտ մշակել են վերքը, ավելի թեթեւ վիճակ է: Տնօրենից նաեւ տեղեկացանք, որ հոր եւ դստերը վնասվածք հասցրել է իրենց դիմացի հարեւանը: Ըստ որում՝ սա առաջին դեպքը չէ, ավելի վաղ եւս նրանց միջեւ վիճաբանություն էր եղել, հարվածներ, վնասվածքներ, պարզապես բանը հոսպիտալացմանը չէր հասել:
Ավելի վաղ հայտնել էինք, որ Շիրակի մարզում դանակահարել են հորն եւ դստերը, նրանք տեղափոխվել են հիվանդանոց: NEWS.am-ի տեղեկություններով՝ Ամասիայի առողջարարական կենտրոն «երկու կրծքագեղձերի եւ ձախ նախաբազկի միջին երրորդի դրսային մակերեսի կտրած-ծակած չթափանցող վերք» ախտորոշմամբ բուժօգնության է դիմել 46-ամյա Յուլյա Ա-ն եւ «ձախ կիսաազդրային շրջանի արյունահոսող կտրած-ծակած չթափանցող վերք» ախտորոշմամբ` 84-ամյա Մաքսիմ Ա.-ն:
Իրավապահները պարզել են, որ նույն օրը ժամը 8.50-ի սահմաններում, 62-ամյա Վալերի Գ.-ն ձեռքին եղած կենցաղային դանակով հարվածներ է հասցրել վերջիններիս` պատճառելով վնասվածքներ: Ըստ բժշկի տեղեկանքի վերջիններս ի վիճակի չեն հաղորդում տալու:
Դանակն առգրավված է: Նշանակվել է դատաբժշկական փորձաքննություն, Վալերի Գ.-ն ստորագրությամբ բաց է թողնվել: Կատարվում է քննություն:
