Beeline-ը ռադիո «Ավրորա» 100.7 FM-ի հետ համատեղ հայտարարում է «Մեր հաղթանակների պատմությունները» խորագրով մրցույթի անցկացման մասին, որը նվիրվում է Հաղթանակի 70-ամյակին եւ Շուշիի ազատագրման 23-ամյակին:
Մրցույթի հաղթողները որպես մրցանակ Beeline-ի կողմից կստանան Beeline Smart սմարթֆոններ, ինչպես նաեւ հնարավորություն կունենան մայիսի 9-ին ռադիո «Ավրորա»-ի ուղիղ եթերում ներկայացնելու իրենց պատմությունը:
Մրցույթին մասնակցելու համար անհրաժեշտ է ներկայացնել Հայրենական Մեծ պատերազմի կամ Արցախյան ազատամարտի տարիներին տեղի ունեցած պատմություն` կապված հարազատ կամ ծանոթ մարդկանց հետ: Պատմություններն անհրաժեշտ է ուղարկել մինչեւ մայիսի 7-ը ներառյալ հետեւյալ հասցեներով. Երեւան, Ահարոնյան 2, [email protected] էլեկտրոնային հասցեին` «Մեր հաղթանակների պատմությունները» նշումով կամ Facebook սոցիալական ցանցում Beeline Armenia պաշտոնական էջին հաղորդագրության միջոցով: Մրցույթում կհաղթեն երեք մասնակից, ում պատմությունները կընտրվեն հանձնաժողովի կողմից:
«Վստահ եմ, որ «Մեր հաղթանակների պատմությունները» մրցույթի շնորհիվ այս երկու հաղթանակները կներկայացվեն նոր լույսի ներքո` հասարակությանը եւ հատկապես երիտասարդ սերնդին հնարավորություն տալով վերստին գիտակցել ու գնահատել հաղթանակի եւ խաղաղության արժեքը», - նշել է Հայաստանում Beeline-ի Գլխավոր տնօրեն Անդրեյ Պյատախինը:
«Ռադիո «Ավրորա»-ի համար մեծ պատիվ է ուղիղ եթեր հրավիրել «Մեր հաղթանակների պատմությունները» մրցույթի բոլոր հաղթողներին: Մայիսի 9-ին «Ավրորա»-ի եթերը ինչպես FM, այնպես էլ www.radioaurora.am կայքում առցանց հեռարձակումով, ամբողջությամբ նվիրված կլինեն երկու մեծ հաղթանակներին, մեր հայրերի եւ պապերի` պատերազմի տարիներին տեղի ունեցած պատմություններին, որոնք կներկայացվեն ձեր, ձեր հարազատների, հնարավոր է նաեւ իրենց` հերոսների շուրթերով: Դրանք այն պատմություններն են, որոնցով հյուսված են մեր հաղթանակները», - նշել է «Ավրորա» ռադիոկայանի տնօրենի տեղակալ Ռուզաննա Շահինյանը:
Նշենք, որ մրցույթի հաղթողների պատմությունները կհրապարակվեն www.beeline.am պաշտոնական կայքում:
«Մեր հաղթանակների պատմությունները» մրցույթի պայմաններին առավել մանրամասն կարելի է ծանոթանալ հետեւյալ հղումով: