Մյունխենում այսօր՝ ապրիլի 28-ին, սկսվել է Deutsche Bank-ի գործող ու նախկին ղեկավարների աղմկահարույց դատավարությունը, որոնց մեղադրում են Լեո Կիրհի մեդիա-կայսրության գործով կեղծ ցուցմունքներ տալու մեջ:
Գերմանական մամուլը գրում է, որ սա «Գերմանիայի պատմության մեջ ամենաաղմկահարույց տնտեսական դատական գործընթացն» է:
Դատարանի առջեւ են կանգնելու Deutsche Bank-ի տնօրենների խորհրդի ներկա համանախագահ Յուրգեն Ֆիտշենը, այդ պաշտոնում նրա նախորդներ Յոզեֆ Աքերմանը եւ Ռոլֆ Բրոյերը, ինչպես նաեւ տնօրենների խորհրդի երկու նախկին անդամներ:
Կիրհը վստահ է եղել, որ իր ընկերության սնանկացման պատճառը Deutsche Bank-ի այն ժամանակվա ղեկավար Ռոլֆ Բրոյերի հայտարարությունն է, որը կասկածի տակ է առել մեդիա հոլդինգի վարկունակությունը:
6,5 մլրդ պարտքային պարտավորություններով այդ ընկերության սնանկացումը ամենախոշորն է Գերմանիայի վերջին տարիների պատմության մեջ: «Ռոլֆն ինձ գնդակահարեց»,-ասել էր Կիրհը՝ խոստանալով վրեժ լուծել:
Կիրհը պնդում է, որ բանկը ցանկանում էր փող աշխատել մեդիա կայսրության կործանումից:
