Ապրիլի 24-ից հետո նորից քաղաքական օրակարգում է Սահմանադրական բարեփոխումների թեման: ԱԺ ԲՀԿ-ական պատգամավոր, կուսակցության մամուլի խոսնակ Վահան Բաբայանը NEWS.am-ի թղթակցի հետ զրույցում ասաց, որ Սահմանադրական բարեփոխումների գործընթացի հետ հետ կապված այս պահին իրեն մանրամասներ հայտնի չեն:
Վահան Բաբայանը նշեց, որ ԲՀԿ դիրքորոշումը խորհրդարանական կառավարման համակարգի հետ կապված մնում է անփոփոխ, եթե առաջարկվի կիսանախագահական համակարգում որոշակի փոփոխություններ, ապա վստահ է, որ իրենք կունենան առաջարկություններ:
«Խորհրդարանական համակարգը չի կարող ապահովել մեր ներքին եւ արտաքին անվտանգության երաշխիքները, եւ խորհրդարանին առաջնային մանդատ տալով՝ կարող են մի շարք անհաղթահարելի խնդիրներ լինել: Իսկ կիսանախագահական տարբերակը բարելավել կամ փոփոխելը կարող է դառնալ մեր քննարկման առարկան»,-ասաց Վահան Բաբայանը:
Հիշեցնենք, որ սահմանադրական բարեփոխումների գործընթացի շրջանակներում Սերժ Սարգսյանը մարտի 12-ին հանդիպել է ԲՀԿ, ՄԱԿ, ՀՅԴ, ՀՀՇ, «Ժառանգություն», «Օրինաց երկիր» կուսակցությունների, իսկ ՀՀԿ գործադիր մարմնի ընդլայնված նիստում նաեւ՝ «Հայաստանի քրիստոնեա-դեմոկրատական միություն», «Սահմանադրական իրավունք միություն» եւ «Ազգային միաբանություն» կուսակցությունների ներկայացուցիչների հետ: ՀԱԿ-ի ներկայացուցիչներին նման հրավեր չի ուղարկվել: