«Հայոց ցեղասպանության 100-րդ տարելիցը ցույց տվեց, որ աշխարհով մեկ սփռված հայությունը 1915 թ. մեծագույն ողբերգությունից 100 տարի անց շարունակում է պայքարել հանուն պատմական արդարության հաղթանակի, եւ այդ պայքարում հայ ժողովուրդը միայնակ չէ։ Այդ մասին ասել է ԱԺ պատգամավոր, ՀԱԿ խմբակցության անդամ Ստեփան Դեմիրճյանը։
«Այսօր մենք պետք է արժանին մատուցենք բոլոր այն անհատներին եւ կազմակերպություններին, որոնք իրենց գործունեությամբ նպաստել են Հայոց ցեղասպանության միջազգային ճանաչմանն ու դատապարտմանը, եւ արձանագրենք այդ ուղղությամբ առկա առաջընթացը։ Այս օրերին շատ է խոսվում, թե որն է լինելու մեր հետագա անելիքը։ Կարծում եմ՝ ակնհայտ է, որ թե՛ մեր անմեղ նահատակների հիշատակը հարգելու, թե՛ մեր ազգային նպատակներն ու իղձերը իրականացնելու, թե՛ մեր ժողովրդի հուսալի ապագան երաշխավորելու համար պետք է հզորացնենք մեր պետությունը, ամրապնդենք պետականությունը, Հայաստանը դարձնենք զարգացած, մրցունակ, ժողովրդավարական երկիր, որը պայմաններ կստեղծի իր քաղաքացիների արժանապատիվ կյանքի համար։ Իշխանությունը յուրացնելով եւ երկրի հարստությունը մի խումբ մարդկանց ձեռքում կենտրոնացնելով՝ պետություն չես կառուցի»,- նշել է Դեմիրճյանը։
Նրա խոսքով, այսօր առաջնահերթ խնդիրներն են երկրում օրինականության եւ արդարության հաստատումը, կոռուպցիայի դեմ իրական պայքարի ծավալումը եւ անպատժելիության վերացումը, տնտեսության առողջացումը եւ աշխատատեղերի ստեղծումը, աղքատության հաղթահարումը, արտագաղթի կասեցումը։ «Եվ այս խնդիրների լուծման համար ամենեւին անհրաժեշտ չէ Սահմանադրությունը փոխել։ Ընդամենը պետք է Սահմանադրությանը համաձայն` ազատ եւ արդար ընտրությունների միջոցով իշխանություն ձեւավորել։ Դա է երկրի բնականոն զարգացման նախապայմանը։ Առանց դրա թե՛ կիսանախագահական եւ թե՛ խորհրդարանական կառավարման մոդելների քողի տակ երկրում կարող է հաստատվել ֆեոդալական տիպի հասարակարգին բնորոշ ինչ-որ համակարգ»,- նկատել է նա։
