Երկիրը շարունակում է խեղդվել մենաշնորհների եւ անհագուրդ կոռուպցիայի ճիրաններում: Այդ մասին խորհրդարանում հայտարարել է ՀԱԿ խմբակցության ղեկավար Լեւոն Զուրաբյանը։
Նրա խոսքով, Հայոց ցեղասպանության 100-ամյակի միջոցառումները ապրիլի 24-ին նշվեցին հավուր պատշաճի: Այդ օրն ամբողջ աշխարհը խոսեց Ցեղասպանության մասին եւ դատապարտեց այն: «Խոսքեր ասվեցին, որոնք շոյեցին մեր ազգային ինքնասիրությունը եւ հաճելի էին մեր արժանապատվության եւ արդարության զգացման համար: Բայց ապրիլի 25-ից իսկ արդեն աշխարհն անցավ իր սովորական քաղաքական անցուդարձին, բարձրագոչ, գեղեցիկ արարողակարգերից հետո Հայաստանը վերադարձավ իր առօրյա՝ անվտանգության, գոյատեւման եւ սոցիալ-տնտեսական կացության համար նույն ահռելի մարտահրավերներին»,- նշել է Զուրաբյանը:
Այս առումով Ցեղասպանության հիշատակման միջոցառումները ոչինչ չեն փոխել եւ չէին էլ կարող փոխել: Երկիրը շարունակում է խեղդվել մենաշնորհների եւ անհագուրդ կոռուպցիայի ճիրաններում, ասել է պատգամավորը:
«Ճիշտ նշելը կնշանակեր ունենալ ազատ, ժողովրդավար պետություն, որը կդառնար իր քաղաքացիների համար ազատ, ստեղծարար եւ բարեկեցիկ կյանքի ապահով օրրան»,- նկատել է Զուրաբյանը: