Հունաստանում ձերբակալել են Արթուր Ջիոեւին, որի նկատմամբ ռուսական իրավապահները միջազգային հետախուզում էին հայտարարել: Այս մասին ասված է Ռուսաստանի Քննչական կոմիտեի հաղորդագրությունում:
Հիմա որոշվում է Ջիոեւին Ռուսաստանին արտահանձնելու հարցը: Հետաքննության տվյալներով, Ջիոեւն Ասլան Գագիեւի գլխավորած օսական հանցավոր խմբավորման առաջնորդներից է: Նրան ձերբակալել են Ինտերպոլի հետ համատեղ իրականացված գործողության ընթացքում:
Ներկայում խմբավորման 16 անդամ կալանավորված է: 13 մարդու նկատմամբ միջազգային եւ դաշնային հետախուզում էր հայտարարված: Նրանցից 4-ին, այդ թվում՝ Ասլան Գագիեւին եւ Արթուր Ջիոեւին, ձերբակալել են օտար պետությունների տարածքում:
Ասլան Գագիեւի օսական հանցավոր խմբավորումը ստեղծվել է 2004 թվականին: Նրա կազմում շուրջ 50 մարդ կար: Բանդան մասնակցել է ավելի քան 40 պատվիրված սպանության Մոսկվայում, Մերձմոսկվայում եւ Հյուսիսային Կովկասում: