Սիսիանի բժշկական կենտրոնի ծննդաբերական բաժանմունքում անցած տարվա հոկտեմբերի 25-ին մահացած 28-ամյա Անի Դավթյանի գործով նախաքննությունը շարունակվում է: Այս մասին NEWS.am-ին հայտնեցին ՀՀ Քննչական կոմիտեի մամուլի ծառայությունից:
Նրանց փոխանցմամբ՝ նշանակվել է համալիր փորձաքննություն, որի եզրակացությունը դեռեւս չի ստացվել: Գործով մեղադրյալ այս պահին եւս չկա: Համալիր փորձաքննության պատասխանից հետո միայն պարզ կլինի գործի ընթացքը:
Նշենք, որ համալիր փորձաքննությամբ հայտնի կդառնա, թե արդյոք 28-ամյա հղիի մահվան մեջ բժշկական սխալ կա, թե ոչ: Ի դեպ, Անիի հարազատները բժիշկներին են մեղադրում:
Հիշեցնենք, որ ըստ Քննչական կոմիտեի մամուլի ծառայության՝ Անի Դավթյանը հիվանդանոց է տեղափոխվել 2014թ.-ի հոկտեմբերի 24-ին ժամը 14:00-ի սահմաններում, պտղաջրերի էմբոլիա ախտորոշմամբ, մահացել հաջորդ օրը՝ հոկտեմբերի 25-ին, ժամը 22:05-ի սահմաններում։
Դեպքի առթիվ Սյունիքի մարզային քննչական վարչության Սիսիանի քննչական բաժնում նախապատրաստվում են նյութեր:
