Սահմանադրության առաջին երեք գլուխների վրա արդեն աշխատանքը հիմնականում ավարտել ենք: Այս մասին NEWS.am-ի թղթակցի հետ զրույցում ասաց Սահմանադրական փոփոխությունների մասնագիտական հանձնաժողովի անդամ, սահմանադրագետ Վարդան Պողոսյանը:
Նա նշեց, որ այժմ սկսելու են աշխատանքը մնացած գլուխների վրա, հիմնականում՝ կառավարման համակարգի հետ կապված: Ինչ վերաբերում է մինչեւ մայիսի 5-ը քաղաքական ուժերի կողմից առաջարկներ ներկայացնելուն, Վարդան Պողոսյանն ասաց, որ որեւէ բան այդ մասով իրեն հայտնի չէ, հանձնաժողովից ոչինչ չեն փոխանցել:
Անդրադառնալով երկու հայեցակարգի վրա աշխատելուն՝ Վարդան Պողոսյանն ասաց, որ մի տարբերակի վրա են աշխատում, երբ կլինեն քաղաքական կոնսուլտացիաներ, կտեսնեն՝ երկրորդ տարբերակ կլինի թե չէ: «Մենք աշխատում ենք այն տարբերակի վրա, որը հայեցակարգում է նշված եւ նախագահի կողմից հավանության է արժանացել»,-ասաց հանձնաժողովի անդամը:
Խոսելով հանրաքվեի ժամկետների մասին՝ Վարդան Պողոսյանը նշեց, որ դրանք պարզ կդառնան, երբ նախագահը հայեցակարգը ներկայացնի ԱԺ, վերջինս էլ այն հաստատի: Իսկ թե երբ հանձնաժողովը հայեցակարգը կներկայացնի նախագահին կախված է նրանից, թե ինչքան առաջարկներ կլինեն: «Այժմ աշխատանքային պրոցես է, առաջին երեք գլուխները ավարտված են, առաջիկայում Վենետիկի հանձնաժողովի աշխատանքային խմբի հետ քննարկումներ կանցկացնենք, հետո կտեսնենք, թե առաջընթացը ինչպիսին կլինի մյուս գլուխների հետ կապված»,-ասաց Վարդան Պողոսյանը:
Նշենք, որ նախագահ Սերժ Սարգսյանը հանդիպել էր քաղաքական տարբեր ուժերի հետ եւ քննարկել սահմանադրական բարեփոխումների վերաբերյալ հարցեր: Սահմանադրական բարեփոխումները նախատեսված են 2016թ: Հայտնի է, որ դրանց վերաբերյալ պաշտոնապես առաջարկներ է ներկայացրել միայն ՀՅԴ-ն: