Հենց սկզբից էլ ԵՏՄ-ն Ղազախստանի նախագահ Նուրսուլթան Նազարբաեւը ցանկացել է մեկնաբանել որպես թուրքական երկրների միություն: Այս մասին NEWS.am-ի հետ զրույցում ասաց քաղաքական եւ միջազգային հարաբերությունների հայկական կենտրոնի տնօրեն, քաղաքագետ Աղասի Ենոքյանը՝ մեկնաբանելով Ղազախստանի նախագահի հայտարարությունը, թե Թուրքիան հետաքրքրված է ԵՏՄ-ով, փորձում է թուրքական շահերը ներկայացնել այդ կառույցում:
Քաղաքագետը պատահական չի համարում այդ խոսակցությունները՝ շեշտելով, որ Նազարբաեւը առաջ է քաշում իր պրոյեկտը, ինչը բնական է: «ԵՏՄ-ն այդպիսին է, մենք կարող ենք մնալ կամ մնալ, եթե Թուրքիան մտնի ԵՏՄ, անիմաստ է դառնում այն մեր համար, եթե մինչեւ այդ ասում էին, որ կարող է շուկա բացել, դա էլ է վերանում: Միեւնույն է՝ ԵՏՄ-ում էլ Թուրքիան չի հանի Հայաստանի հանդեպ բլոկադան»,-ասաց Աղասի Ենոքյանը:
Քաղաքագետը նաեւ շեշտեց, որ ԵՏՄ-ն իրականության մեջ գոյություն չունի, այն ուղղակի Ռուսաստանի կցորդն է, քանի որ Արեւմուտքը ներկայանում է ՆԱՏՕ-ով, ԵՄ-ով, Ռուսաստանն էլ ցանկանում է նման կառույց ունենալ եւ անունը դրել է ԵՏՄ: Նա իրատեսական չի համարում, որ Թուրքիան կմտնի ԵՏՄ, ինչքան էլ Նազարբաեւը այն ցանկանում է դարձնել թուրքական երկրների միություն:
