Լոս Անջելեսի քաղաքային խորհրդի անդամ Փոլ Գրեգորյանը հայտարարել է Հայոց ցեղասպանության 100-րդ տարելիցի առիթով Լոս Անջելեսի հանրային գրադարանի համար գրքերի հավաքագրման արշավ սկսելու մասին: Արշավը շարունակվելու է մինչեւ 2015 թվականի մայիսի վերջը:
Ըստ «Asbarez»-ի, արշավի նպատակն է՝ նոր կամ քիչ օգտագործված գրքեր հավաքել Հայոց ցեղասպանության, հայոց պատմության եւ մշակույթի, ինչպես նաեւ այլ ցեղասպանությունների մասին: Գրքերը կարող են լինել անգլերեն, հայերեն կամ ցանկացած այլ լեզվով:
Լոս Անջելեսի հանրային գրադարանում եւ մասնաճյուղերում այդ նպատակով արկղեր են տեղադրվելու: Գրքերը կարելի է տանել նաեւ քաղաքապետարանում գտնվող Փոլ Գրեգորյանի աշխատասենյակ կամ Հյուսիսային Հոլիվուդի նրա անձնական գրասենյակ:
