«Հիմնադիր խորհրդարանի» անդամ Գեւորգ Սաֆարյանը այսօր դադարեցրել է հացադուլը։ Արդարադատության նախարարությունից հայտնում են, թե ավելի քան 10 օր հացադուլի մեջ գտնվող կալանավորված անձ Գեւորգ Սաֆարյանը, նախարարության գործուն քայլերի շնորհիվ, այսօր դադարեցրել է հացադուլը եւ տեղափոխվել նոր բանտախուց:
Գեւորգ Սաֆարյանի պաշտպան Հայկ Գրիգորյանը ավելի վաղ հայտնել էր, թե Սաֆարյանն առողջական խնդիրներ չունի: «Երեկ եմ այցելել, վիճակը բավարար է, մի քիչ թուլություն ունի: Նա մտադրություն չուներ հացադուլը դադարեցնելու, մի քանի օր էլ դեռ կշարունակի»,- այսօր լրագրողներին ասել էր պաշտպանը։
Ավելի վաղ NEWS.am-ը հայտնել էր, որ «100-ամյակն առաց ռեժիմի» շարժումն ապրիլի 7-ին հայտարարել էր, որ առավոտյան ժամը 06:35-ի սահմանում «Հիմնադիր խորհրդարանի» շենք են ներկայացել իրավապահ մարմինների շուրջ երկու տասնյակ աշխատակիցներ եւ խուզարկություն իրականացրել: Խուզարկություններ են անցկացվել նաեւ ՀԽ անդամների տներում, որից հետո բերման են ենթարկվել Ժիրայր Սեֆիլյանը, Վարուժան Ավետիսյանը, Պավել Մանուկյանը, Հայկական վերածնունդի Լիբանանյան ներկայացուցիչ Թորոս Սեֆիլյանը (Ժիրայր Սեֆիլյանի եղբայր), Հովհաննես Ղազարյանը, Արամ Հակոբյանը, Գեւորգ Սաֆարյանը: Ավելի ուշ Ժիրայր Սեֆիլյանը, Վարուժան Ավետիսյանը, Գեւորգ Սաֆարյանը, Պավել Մանուկյանը եւ Գարեգին Չուգասզյանը ձերբակալվել են, ապա կալանավորվել: Նրանց նկատմամբ մեղադրանք է առաջադրվել Քրեական օրենսգրքի 225 հոդվածի 1-ին մասի հատկանիշով՝ զանգվածային անկարգություններ նախապատրաստելու հատկանիշով։ Իր հերթին հաղորդագրություն էր տարածել ՀՀ Քննչական կոմիտեն, որում ասվում է, որ ՀՀ ազգային անվտանգության ծառ այության եւ ՀՀ քննչական կոմիետի համատեղ ձեռնարկած միջոցառումների արդյունքում կանխվել է 2015թ. ապրիլի 24-ին հրապարակային միջոցառումների անցկացման վայրերում զանգվածային անկարգությունների կազմակերպումը:
