Հայաստանի ու Ադրբեջանի նախագահները կարող են հանդիպել մինչեւ տարեվերջ եւ այդ ուղղությամբ աշխատանքներ են տավում: Այս մասին հայտարարություն է տարածել ԵԱՀԿ Մինսկի խմբի համանախագահները:
Հայտարարությունում մասնավորապես, նշվում է.
«ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ջեյմս Ուորլիքը (ԱՄՆ), Պիեռ Անդրյուն (Ֆրանսիա) Փարիզում առանձին հանդիպումներ են ունեցել Հայաստանի ԱԳ նախարար Էդվարդ Նալբանդյանի եւ Ադրբեջանի ԱԳ նախարար Էլմար Մամեդյարովի հետ: Այդ հանդիպումներին մասնակցել է նաեւ ԵԱՀԿ գործող նախագահի անձնական ներկայացուցիչ, դեսպան Անջեյ Կասպշիկը:
Հանդիպման ժամանակ երկու երկրների ԱԳ նախարարները պատմել են Երեւանում եւ Բաքվում ապրիլի 24-25-ին Ֆրանսիայի նախագահ Ֆրանսուա Օլանդի հետ տեղի ունեցած հանդիպումների մասին:
Մենք ընդգծել ենք Հայաստանի ու Ադրբեջանի նախագահների երկխոսության ակտիվացման կարեւորությունը եւ շարունակում ենք մինչեւ այս տարվա վերջ նախագահների հաջորդ հանդիպման նախապատրաստությունը:
Նախարարները պայմանավորվել են միմյանց (նաեւ համանախագահների հետ) հանդիպելու մասին` երկու երկրների նախագահների հանդիպման օրակարգը ձեւավորելու համար եւ ողջունել են համանախագահների առաջիկա այցը տարածաշրջան»:
Համանախագահներն իրենց հայտարարությունում անդրադարձել են նաեւ մայիսի 3-ին ԼՂՀ-ում կայանալիք խորհրդարանական ընտրություններին, որտեղ «խորհրդարանական ընտրություններ» արտահայտությունը չակերտների մեջ է առնված:
«Հակամարտության համապարփակ լուծման համատեքստում՝ մենք ընդունում ենք ԼՂ ժողովրդի դերը՝ իր ապագան կերտելիս։ Այդուհանդերձ, ոչ երեք երկրներից (համանախագահող-խմբ) որեւէ մեկը, ոչ էլ մեկ այլ երկիր չի ճանաչել Լեռնային Ղարաբաղը որպես անկախ եւ ինքնիշխան պետություն։ Հետեւաբար մենք չենք ճանաչում այդ ընտրությունների արդյունքները որպես Լեռնային Ղարաբաղի իրավական կարգավիճակի վրա ազդող եւ ընդգծում ենք, որ դրանք ոչ մի կերպ չեն կանխորոշում ԼՂ վերջնական կարգավիճակը կամ բանակցությունների արդյունքը, որոնք ընթանում են հակամարտության տեւական եւ խաղաղ կարգավորման հասնելու համար»,-ասված է համանախագահների հայտարարությունում: