Առաջիկա շաբաթվա ընթացքում կվերագործարկվի «Բարգավաճ Հայաստան» կուսակցության կայքը, որտեղ էլ կհրապարակվի քաղխորհրդի կազմը: ԲՀԿ ղեկավար Նաիրա Զոհրաբյանը NEWS.am-ի թղթակցի հետ զրույցում ասաց, որ քաղխորհրդի կազմը հաստատում է համագումարը, ուստի՝ նոր մարդիկ չեն լինի քաղխորհրդում, ընդամենը կազմից հանել են նրանց, ովքեր դուրս են եկել ԲՀԿ-ից:
«Քաղխորհրդի կազմում անակնկալ չի կարող լինել, հանել ենք նրանց, ովքեր դուրս են եկել իրենց դիմումի համաձայն: Եղել են մարդիկ, ովքեր դիմում չեն գրել, բայց բանավոր հայտարարել են դուրս գալու մասին, այդ հայտարարությունը հիմք ընդունելով՝ հանել ենք»,-ասաց նա՝ հավելելով, որ մնացել է մի քանի հոգու հետ ճշտի մնալ, գնալու հարցերը, իսկ նրանք այժմ գտնվում են արտերկրում:
Նաիրա Զոհրաբյանն ասաց, որ մոտ 50 հոգի դուրս է եկել քաղխորհրդի կազմից, այժմ ԲՀԿ քաղխորհուրդը կունենա մոտ 140-150 հոգի: Ինչ վերաբերում է ԲՀԿ նոր՝ Հանրապետություն փողոցի վրա գտնվող գրասենյակին, ապա կուսակցության ղեկավարն ասաց, որ հետեւում է շինարարական աշխատանքներին, անգամ կիրակի օրերին աշխատանքներ են տարվում, մայիսի վերջին կլինի գրասենյակի բացումը: ԲՀԿ-ն իր մարզային այցերը կսկսի մայիսի 5-ին կայանալիք ԱԺ արտահերթ նստաշրջանից հետո:
