Հանրահայտ ֆրանսիացի դերասան Պիեռ Ռիշարը հրատարակել է իր հուշերը, որոնք նա կոչել է «Ես ոչինչ չգիտեմ, բայց ամեն ինչ կպատմեմ» կատակերգության անունով։ 80-ամյա Ռիշարին օգնել է լրագրող Ժերեմի Էմբերը։
Պիեռ Ռիշարը մասնավորապես պատմում է այն մասին, թե ինչպես է նա՝ հարուստ ընտանիքի զավակը, ընտրելով սեփական ճանապարհը, որոշ ժամանակ գումար վաստակել՝ աշխատելով որպես մերսող։
Նա պատմում է նաեւ դերասանական ճգնաժամի մասին, որը վրա էր հասել 1980թ. «Ծակոց հովանոցով» ֆիլմի նկարահանման ժամանակ։ Նա կտրականապես հրաժարվում էր խաղալ անհեթեթ կերպարի դերում։
Ռիշարը փակվել էր Փարիզի Պերեր հրապարակի վրա գտնվող հեռախոսի խցիկում եւ հրաժարվել էր դուրս գալ այնտեղից, մինչեւ ճգնաժամը չհաղթահարի, գրում է ՏԱՍՍ-ը։
«Իսկ հիմա հակառակի պես ինձ լուրջ դերեր են առաջարկում, որտեղ ես ֆիլմի վերջում անպայման մահանում եմ»,- պատմում է դերասանը։
Իր հուշերում նա հիացմունքով է խոսում ֆիլմերում իր հետ նկարահանված Ժերար Դեպարդիեի մասին։
