Գյումրիում հունվարի 15-ի բախումների գործով Սառնաղբյուր գյուղի բնակիչ, 22-ամյա Մնացական Ալեքսանյանին առաջադրված մեղադրանքը չի վերացվել: Այս մասին NEWS.am-ի թղթակցի հետ զրույցում ասաց ձերբակալված, այնուհետեւ ստորագրությամբ ազատ արձակված մեղադրյալի փաստաբանը՝ Հայկ Հարությունյանը:
Նա նշեց, որ չնայած հսկայական գործ կա անելու այդ գործով ապացույցներ ձեռք բերելու տեսանկյունից, բայց բացարձակապես ոչինչ չի արվում, քննչական մարմինները վերեւից հրահանգ են ստացել՝ սպասել համաներմանը: Հայկ Հարությունյանը նշեց նաեւ, որ թե դատախազությանը, թե քննչական կոմիտեին բողոքարկել են, որպեսզի Մնացական Ալեքսանյանից հանվի մեղադրանքը, սակայն իրենց հայտնել են, որ տարվում է քննություն եւ վերջնական իրավական գնահատական տալու համար դեռ ապացույցներ կան հետազոտելու: Փաստաբանի կարծիքով՝ պետական մարմնի նպատակն այն է, որ այդ հարցի շուրջ բողոքի ցույցեր չլինեն եւ վախի մթնոլորտ ստեղծվի:
Նշենք, որ Մնացական Ալեքսանյանը Գյումրիի բախումների գործով ձերբակալված առաջին անձն էր: Մնացական Ալեքսանյանին մեղադրանք է առաջադրվել ՀՀ քրեական օրենսգրքի 258-րդ հոդվածի 4-րդ մասով, այն է՝ խուլիգանություն, որը զուգորդվել է անձի առողջությանը միջին ծանրության վնաս պատճառելով: Նրա նկատմամբ խափանման միջոց էր ընտրվել ստորագրություն չհեռանալու մասին:
Հիշեցնենք, որ բախումները տեղի էին ունեցել հունվարի 15-ին Գյումրիում ՌԴ հյուպատոսարանի շենքի առջեւ ոստիկանների եւ ցուցարարների միջեւ: Բախումներից հետո Գյումրիի հիվանդանոց էր դիմել 33 անձ, որոնցից 10-ը քաղաքացի, 23-ը՝ ոստիկան:
Բողոքի ակցիայի մասնակիցները պահանջում էին Հայաստանին հանձնել Գյումրիում հունվարի 12-ին Ավետիսյանների ընտանիքի 7 անդամներին սպանելու համար մեղադրվող Վալերի Պերմյակովին: