Լեռնային Ղարաբաղի Հանրապետության միջազգային ճանաչումը ընդամենը ժամանակի հարց է։ Այս մասին NEWS.am-ի թղթակցի հետ զրույցում հայտարարեց ԱՄՆ Քալիֆորնիայի նահանգի Ֆրեզնո քաղաքի քաղաքապետ Անդրեաս Բորգեասը, որը դիտորդական առաքելությամբ գտնվում է ԼՂՀ-ում։
Ըստ նրա՝ ամեն լեգիտիմ պետություն պետք է ստիպի իր ձայնը լսելի դարձնել եւ անի դա իր ինստիտուտների միջոցով։ «Իսկ Լեռնային Ղարաբաղը սեփական ինստիտուտները զարգացնելու եւ թափանցիկ ժողովրդավարական գործընթացին խթանելու մեծ ձգտում է դրսեւորել։
Այդ պատճառով ես կարծում եմ, որ դա շատ էական փորձ է ոչ միայն Ղարաբաղի բնակիչների համար, այլ նաեւ նրանց համար, ովքեր դրսից են հետեւում երկրի ներսում ընթացող գործընթացին»,- նշեց Անդրեաս Բորգեասը։ Նա նաեւ ընդգծեց, որ Լեռնային Ղարաբաղում ժողովրդավարությունը բարգավաճում է։
«Մենք այստեղ ենք, որպեսզի արձանագրենք, որ ամեն բան նորմալ է ընթանում եւ նշենք, որ ընտրությունները երկրի ինքնիշխանության արտահայտման վերջնական ուղին է»,- հավելեց Բորգեասը։
Անդրադառնալով ԼՂՀ միջազգային ճանաչման գործընթացին՝ նա հիշեցրեց, որ Լեռնային Ղարաբաղի անկախության ճանաչման բանաձեւի ընդունման կողմնակիցներից է։ «Քալիֆորնիան ընդունել է ԼՂՀ անկախությունն ու ինքնիշխանույթունը։ Հետեւաբար Ամերիկայի առանձին նահանգներ առաջ են շարժվում այս ուղղությամբ։ Մենք մեր ազգային առաջնորդներին խրախուսում ենք լուրջ վերաբերվել Լեռնային Ղարաբաղի անկախության ճանաչման գործընթացին։ Մենք գիտենք, որ կան դժվարություններ, սակայն մենք հավատում ենք, որ Լեռնային Ղարաբաղը ճանաչած երկրների քանակը ինչ-որ պահի կաճի։ Դա ընդամենը ժամանակի հարց է»,- եզրափակեց Անդրեաս Բորգեասը։
Հիշեցնենք, որ մայիսի 3-ին Լեռնային Ղարաբաղի Հանրապետությունում կկայանան հերթական խորհրդարանական ընտրությունները։
