Խորհրդարանական ընտրություններն ապացուցում են, որ Լեռնային Ղարաբաղի քաղաքացիները ճիշտ ուղղությամբ են գնում եւ անում են այն, ինչ հարիր է ամեն մի անկախ պետությանը։ Այս մասին NEWS.am-ի թղթակցի հետ զրույցում հայտարարել է Ընտրական համակարգերի փորձագիտական միջազգային կենտրոնի նախագահ, իսրայելցի քաղաքագետ Ալեքսանդր Ցինկերը։
Լեռնային Ղարաբաղում մարդիկ ընտրում են իշխանության մարմիններին, այսինքն՝ ինստիտուտներ են կառուցում, որը հատուկ է բոլոր պետություններին։ «Մենք այսօր այցելել ենք ե՛ւ խորհրդարանի խոսնակին, ե՛ւ վարչապետին, ե՛ւ ԼՂՀ նախագահին։ Այսինքն՝ օրենսդիր, գործադիր իշխանությունների բոլոր ճյուղերը, բոլոր այդ կառույցները, որոնք պետք է գոյություն ունենան, այսօր ստեղծվել են Լեռնային Ղարաբաղում։
Իսկ ժողովրդավարական ընտրությունների անցկացումը այդ մարմին ինստիտուտներին լեգիտիմությունը են տալիս։ Ուստի մենք մեծ հույսեր ունենք, որ ընտրությունները լավ կանցնեն, եւ եթե մենք նրանց ժողովրդավար ճանաչենք, դա իմ խոսքերի հաստատումը կլինի»,- ասել է Ալեքսանդր Ցինկերը։
Ինչ վերաբերում է ԼՂՀ միջազգային ճանաչմանը, նա ընդգծեց, որ այսօր այդ գործընթացը բավական բարդ է, եւ խնդիրը պետք է լուծվի փոխզիջումների ճանապարհով։ «ԵԱՀԿ Մինսկի խումբը կարող է միայն օգնել, սակայն փոխզիջման համար երկու կողմ է անհրաժեշտ։ Ես հուսով եմ, որ երկրորդ կողմը՝ Ադրբեջանը, նույնպես կհասկանա, որ փոխզիջումը կարող է դառնալ այդ խնդրի լուծումը, եւ այդ ժամանակ գործընթացը կշարժվի մեռյալ կետից։
Ողջ միջազգային հանրությունը կտեսնի, որ գործընթացը սկսել է շարժվել այդ ուղղությամբ, այդ ժամանակ էլ ճանաչման հարցը իր լուծումը կստանա մոտ ժամանակներում»,- եզրափակեց Ալեքսանդր Ցինկերը։