Գերմանիայի Բունդեսթագի պատգամավոր Ալբերտ Վայլերը տպավորված է Արցախում տեղի ունեցող ժողովրդավարության գործընթացով: Այս մասին այսօր՝ մայիսի 3-ին, լրագրողների հետ զրույցում ասաց պատգամավորը, որն Արցախ է ժամանել խորհրդարանական ընտրություններին որպես դիտորդ մասնակցելու համար:
«Երկրորդ անգամն է, որ այստեղ եմ, շատ մարդկանց եմ հանդիպել, տպավորված եմ ժողովրդավարական գործընթացով: Ընտրությունները շատ լավ են անցնում, բայց ԼՂՀ միջազգային ճանաչումը միայն ընտրություններով չէ պայմանավորված: Լեռնային Ղարաբաղը չի կարող միայնակ հասնել միջազգային ճանաչման, պետք բազմաթիվ բանակցություններ ընթանան այլ՝ հատկապես հարեւան երկրների հետ: Դա դժվար հարց է, սակայն անհրաժեշտ»,- ասաց պատգամավորը:
Պատգամավորը նշեց, որ հետեւում է ղարաբաղա-ադրբեջանական շփման գծում սահմանային միջադեպերին, տեղյակ է նաեւ ուղղաթիռի կործանման դեպքից. «Սահմանային միջադեպերը բացասական եմ գնահատում, կարծում եմ, որ մենք պետք է կարողանանք մեր աջակցությունը ցուցաբերել»:
Ալբերտ Վայլերը նշեց նաեւ, որ մայիսի 20-ին հայ-գերմանական ֆորում կկայանա, որի ընթացքում այլ հարցերի հետ կքննարկվի նաեւ Լեռնային Ղարաբաղի խնդիրը:
Նշենք, որ այսօր անցկացվող՝ ԼՂՀ խորհրդարանական ընտրություններին մասնակցում են ավելի քան 100 միջազգային դիտորդներ՝ եվրոպական երկրներից, ԱՄՆ-ից, դիտորդներ Հայաստանից։
Լուսանկարը՝ Արսեն Սարգսյանի/NEWS.am