Ես քվեարկել եմ երկրի զարգացման համար, իսկ ներկա խորհրդարանական ընտրությունները վկայում են, որ Արցախը կայացել է որպես պետություն։ Այս մասին, այսօր՝ մայիսի 3-ին, իր քվեարկությունից հետո լրագրողների հետ զրույցում նշել է ԼՂՀ վարչապետ Արայիկ Հարությունյանը։ Նա քվեարկել է Ստեփանակերտի թիվ 3/3 ընտրատեղամասում։ (ֆոտոռեպորտաժ)

«Խորհրդարանական ընտրությունների արդյունքում մենք ակնկալում ենք տեսնել հանրապետության առաջիկա առաջընթացը։ Ես քվեարկել եմ հանուն ։ՂՀ ապագայի»,-ասել է վարչապետը։ Նրա խոսքով լավ կլիներ, եթե միջազգային կառույցները գնահատեին Արցախում հերթական ընտրությունների անցկացման փաստը, սակայն իրականում ընտրությունները երկրում անցկացվում են հանուն արցախցիների եւ երկրի ժողովրդավարական զարգացման, ինչը ժողովրդի համար ավելի կարեւոր է, քան միջազգային գնահատականը։

Հիշեցնենք, որ այսօր՝ մայիսի 3-ին, ԼՂՀ-ում տեղի են ունենում խորհրդարանական ընտրություններ։ ԼՂՀ ԱԺ 33 մանդատների համար պայքարում են համամասնական համակարգով 7 քաղաքական կուսակցություններ՝ «Ազատ հայրենիք» (50 մարդ), «Ազգային վերածնունդ» (14 մարդ), «Արցախի ժողովրդավարական կուսակցություն (35 մարդ), Լեռնային Ղարաբաղի կոմունիստական կուսակցություն (14 մարդ), «Խաղաղություն եւ զարգացում» (6 մարդ), ՀՅԴ (34 մարդ) եւ «Շարժում 88» (14 մարդ):

Մեծամասնական ընտրակարգով առաջադրվել է 50 թեկնածու, որոնցից 27-ը ինքնաառաջադրվածներ են։ Երեք թեկնածու առաջադրել է ՀՅԴ-ն, 4-ական թեկնածուներ՝ «Ազատ Հայրենիքը» եւ Արցախի ժողովրդավարական կուսակցությունը, 5 թեկնածու՝ «Ազգային վերածնունդը», 7 թեկնածու՝ «Շարժում 88»-ը։ Մեծամասնական ընտրակարգով առաջադրվածներից 34-ն անկուսակցական են։

Լուսանկարները՝ Արսեն Սարգսյանի/NEWS.am