ԼՂՀ խորհրդարանական ընտրությունների ընթացքում մինչ այս պահը աննշան խախտումներ են արձանագրվել։ Այս մասին լրագրողների հետ զրույցում նշել է ԼՂՀ ընտրություններում պատգամավորի թեկնածու, «Ազգային վերածնունդ» ընդդիմադիր կուսակցության նախագահ Հայկ Խանումյանը։
Նրա խոսքով, խորհրդարանական ընտրությունների արդյունքում իրենք ակնկալում են քաղաքական մակարդակի բարձրացում։ «2010 թվականի խորհրդարանական ընտրությունների համեմատ այսօր ընթացող ընտրությունները տարբերվում են իրենց մրցունակությամբ։ Ինչ վերաբերում է իշխանություններից կողմից արդար ընտրություններ անցկացնելու սպասումներին, մենք նման սպասումներ չունենք», նշել է նա։
Խանումյանը նաեւ վստահություն է հայտնել, որ իր գլխավորած կուսակցությունը կհաղթահարի նախատեսված նվազագույն շեմը եւ կանցնի խորհրդարան։
Հիշեցնենք, որ այսօր՝ մայիսի 3-ին, ԼՂՀ-ում տեղի են ունենում խորհրդարանական ընտրություններ։ ԼՂՀ ԱԺ 33 մանդատների համար պայքարում են համամասնական համակարգով 7 քաղաքական կուսակցություններ՝ «Ազատ հայրենիք» (50 մարդ), «Ազգային վերածնունդ» (14 մարդ), «Արցախի ժողովրդավարական կուսակցություն (35 մարդ), Լեռնային Ղարաբաղի կոմունիստական կուսակցություն (14 մարդ), «Խաղաղություն եւ զարգացում» (6 մարդ), ՀՅԴ (34 մարդ) եւ «Շարժում 88» (14 մարդ):
Մեծամասնական ընտրակարգով առաջադրվել է 50 թեկնածու, որոնցից 27-ը ինքնաառաջադրվածներ են։ Երեք թեկնածու առաջադրել է ՀՅԴ-ն, 4-ական թեկնածուներ՝ «Ազատ Հայրենիքը» եւ Արցախի ժողովրդավարական կուսակցությունը, 5 թեկնածու՝ «Ազգային վերածնունդը», 7 թեկնածու՝ «Շարժում 88»-ը։ Մեծամասնական ընտրակարգով առաջադրվածներից 34-ն անկուսակցական են։