ԼՂՀ խորհրդարանական ընտրություններն անցնում են հանգիստ, առանց միջադեպերի, միջազգային չափանիշներին համապատասխան: Այս մասին այսօր` մայիսի 3-ին, լրագրողների հետ զրույցում ասաց Հունաստանից ժամանած դիտորդ Էրսի Քոին` նշելով, որ ինքը կարծիք է կազմել Ստեփանակերտի 9 տեղամասերում լինելով, ամբողջ գործընթացի մասին խոսել չի կարող:
«Մենք գնում ենք պատահական ընտրատեղամասեր, կես ժամ մնում եւ նշումներ ենք անում գործընթացի վերաբերյալ: Ես եղել եմ միայն մի քանի տեղամասերում շատ լավ էր ընթանում գործընթացը, մենք ուրախ ենք, թե ինչքան բան ենք տեսել»,- ասաց նա` նշելով, որ եթե անգամ աշխարհի շատ երկրներ չեն ճանաչում ընտրությունները, կարեւոր է, որ գործընթացը լավ է անցնում:
Էրսի Քոին առաջին անգամ է Արցախում, նա նշեց, որ տպավորված է տեսարժան վայրերով. «Շատ լավ տեսարան է, հիանալի լեռներ կան, անտառներ: Ինքս երբեք չէի եղել Կովկասյան լեռներում: Շատ տպավորված եմ երկրի գեղեցկությամբ»:
Նշենք, որ այսօր ԼՂՀ-ում անցկացվում են խորհրդարանական ընտրություններ: