Ոստիկանության Երեւան քաղաքի վարչության օպերատիվ կառավարման կենտրոնից մայիսի 2-ին, ժամը 22.30-ին Էրեբունու բաժնում հաղորդում է ստացվել, որ զանգահարել է մի կին եւ հայտնել, որ Նոր Արեշի փողոցում դանակահարություն է կատարվել:
Ոստիկանության մամուլի ծառայությունից հայտնում են, որ նույն օրը, ժամը 23.05-ին, 23.25 եւ 23.55 հիվանդանոցից հաղորդումներ են ստացվել, որ «ձախ ազդրի շրջանի ծակած-կտրած վերքեր, սուր արտաքին արյունահոսություն» ախտորոշմամբ բուժօգնության է տեղափոխվել 24-ամյա Արթուր Պ.-ն, «աջ հետույքային շրջանի ծակած-կտրած վերք» ախտորոշմամբ` 55-ամյա Գուրգեն Մ.-ն եւ «գլխի աջ ճակատային շրջանի սալջարդ պատռած վերք, ծնկան հոդերի շրջանների քերծված վերքեր» ախտորոշմամբ 63-ամյա Համլետ Պ.-ն:
Համլետ Պ.-ն մայիսի 3-ին, ժամը 00.15-ին ոստիկանությանը հաղորդում է տվել, որ մայիսի 2-ին, ժամը 22.20-ին, հիշյալ փողոցում, վիճաբանության ժամանակ, անհայտ անձը գարեջրի շշով հարվածել է իր գլխին` պատճառելով վնասվածք,եւ նույն վիճաբանության ժամանակ անհայտ անձը դանակով հարվածել եւ մարմնական վնասվածքներ է պատճառել իր որդուն` Արթուր Պ.-ին ու հարեւանին` Գուրգեն Մ.-ին: