Լեռնային Ղարաբաղում խորհրդարանական ընտրություններին քաղաքացիների մասնակցությունը այնպիսի տոկոս է կազմել, որի մասին կերազեն շատ եվրոպական երկրներ, մինչդեռ ԵՄ-ն եւ նրա կառույցները հայտարարել են, թե չեն ճանաչում Արցախում կայացած ընտրությունները։ Այս մասին ԼՂՀ-ում կայացած մամուլի ասուլիսի ժամանակ հայտարարել է Եվրախորհրդարանի պատգամավոր, «Եվրախորհրդարան-Արցախ» բարեկամության խմբի ղեկավար Ֆրանկ Էնգելը։
«2013թ. մի երկրում, որը ոնց որ Ադրբեջան է կոչվում, նախագահական ընտրություններ կայացան, որոնց արդյունքների մասին հայտարարել էին քվեարկությունից մեկ օր առաջ։ Բուն ընտրություններն այդ երկրում կազմակերպվել էին, որպեսզի նախագահի համար ապահովեին ընտրողների ձայների հավելյալ 10 տոկոսը»,- նշեց Էնգելը։
Նրա խոսքով՝ իրենց հասցրել են այցելել Ղարաբաղի ընտրական 20 տեղամաս, ինչպես Ստեփանակերտում, այնպես էլ՝ գյուղերում։ «Երեկվա ընտրությունները կայացել են միջազգային լավագույն պրակտիկային համապատասխան։ Ցավում եմ, որ ԵՄ-ն հայտարարել է, թե չի ճանաչում այդ ընտրությունները։ Բայց ես վստահ եմ, որ եթե Արցախում ընտրություններ չլինեին, այդ դեպքում Եվրոպայում կդժգոհեին, թե այդ ընտրությունները չեն անցկացվում»։
Հիշեցնենք, որ մայիսի 3-ին ԼՂՀ-ում կայացել են խորհրդարանական ընտրություններ։ Քաղաքացիների մասնակցությունը կազմել է 70.6 տոկոս։
