ԼՂՀ-ում խորհրդարանական ընտրությունները տեղի են ունեցել հավասար քաղաքական մրցակցության պայմաններում, քվեարկության բոլոր փուլերը դրական են գնահատվում: Այս մասին, այսօր՝ մայիսի 4-ին, Ստեփանակերտում կայացած մամուլի ասուլիսի ժամանակ նշել է ռուսական դիտորդական առաքելության անդամ, քաղաքական գործիչ, տնտեսագետ, քաղաքագետ, «Յաբլոկո» կուսակցության քաղխորհրդի անդամ Վիկտոր Շեյնիսը՝ հավելելով, որ ռուսաստանցի դիտորդներն այցելել են զգալի թվով ընտրատեղամասեր, որոնք գտնվում են ԼՂՀ բոլոր վարչական շրջաններում:
«Որեւէ միջադեպ կամ խախտում, որոնք կարող էին ազդել քաղաքացիների կամարտահայտման վրա, դիտորդական առաքելությունը չի արձանագրել: Քվեների հաշվարկման գործընթացը թափանցիկ է իրականացվել: Տեղի ունեցած քվեարկության բոլոր փուլերը մենք դրական ենք գնահատում: Միաժամանակ, դիտորդները նկատել են աննշան թերություններ ընտրատարածքային ընտրական հանձնաժողովների աշխատանքում, որոնք ավելի շատ տեխնիկական բնույթ են կրել:
Ռուսաստանցի դիտորդների առաքելությունը մայիսի 3-ին ԼՂՀ-ում կայացած ընտրությունները ճանաչում է ամբողջությամբ լեգիտիմ, որոնք համապատասխանում են ժողովրդավարական ընտրությունների անցկացման միջազգային չափանիշների ոգուն ու տառին»,-ասել է Շեյնիսը:
Նրա խոսքով, ռուսական դիտորդական առաքելությունը դիմում է ՄԱԿ-ի անդամ երկրների խորհրդարաններին ու կառավարություններին՝ կոչ անելով ուշադրություն դարձնել ԼՂՀ ընտրությունների արդյունքների վրա եւ քայլեր ձեռնարկել դրանք ճանաչելու ուղղությամբ: