Հայաստանում լրագրողներն իրենց մասնագիտական գործունեության ընթացքում հաճախ են պաշտոնյաների կողմից խոչընդոտների հանդիպում, երբեմն նույնիսկ բռնության ենթարկվում։ Այս մասին այսօր` մայիսի 4-ին, լրագրողների հետ հանդիպմանն ասաց «Ինֆորմացիայի ազատության կենտրոնի» իրավաբան Գևորգ Հայրապետյանը:
«Ամենազավեշտալին էլ այն է, որ որպես կանոն, այդ պաշտոնյաներն անպատիժ են մնում ու շարունակում նույն տեմպերով»,-ասաց նա:
Իրանահայ լրագրող Ռուբիկ Մինասյանն էլ նշեց, որ Հայաստանում լրատվամիջոցների մեծ մասն ազատ չէ, ինչի պատճառը, ըստ նրա, լրատվամիջոց ունենալու չափորոշիչների բացակայությունն է։
«Հաշվի առնելով Freedom House-ի «Մամուլի ազատություն 2015» զեկույցը, որտեղ Հայաստանը մամուլի ազատության ցուցանիշով 199 երկրներից 135-րդ տեղում է, դժվար է Մամուլի ազատության համաշխարհային օրվա կապակցությամբ շնորհավորել մեր լրագրողներին: Այստեղ լրատվական կայքերի, մամուլի, հեռուստատեսությունների մեծ մասն ազատ չէ, ընդամենը ինչ-որ մեկի պատվեր կատարողներն են: Ամեն ինչի պատճառն այն է, որ յուրաքանչյուրն իրավունք ունի չնչին գումարով կայք բացելու և լրագրությամբ զբաղվելու»,- ասաց նա։
Ռուբիկ Մինասյանը համեմատելով Հայաստանի ու Իրանի տեղեկատվության ազատության վիճակը, նշեց, որ Իրանում մամուլի ազատությունը շատ ավելի վատ վիճակում է, ինչպես ադրբեջանականը։ Նրա խոսքով` իրանցիները, չնայած բազում սահմանափակումների, ընթերցող ազգ են և մինչև կեսօր բոլոր թերթերը մամուլի վաճառակետերում վաճառված են լինում. «Այս առումով Հայաստանն ու Իրանն ընդհանրապես անհամեմատելի են: Իրանում, եթե առավոտյան ավտոբուս նստես ու մարդկանց խոսակցությունը լսես, կհասկանաս, որ նրանք այդ օրվա մամուլից են խոսում, իսկ այստեղ համարյա չենք հանդիպում նմանատիպ երևույթների»:
