Լեռնային Ղարաբաղի Հանրապետությունում խորհրդարանական ընտրությունների բարեհաջող անցկացման մասին է վկայում այն հանգամանքը, որ առաջին հերթին ընդդիմադիր ուժերի ներկայացուցիչները նշել են, որ այս ընտրությունները Լեռային Ղարաբաղի պատմության մեջ ամենակազմակերպված էին։ Այս մասին մայիսի 4-ին կայացած մամուլի ասուլիսի ժամանակ հայտարարել է Կովկասի ինստիտուտի փոխտնօրեն, քաղաքագետ Սերգեյ Մինասյանը։
Նրա կարծիքով՝ ԼՂՀ-ում ներքաղաքական պատկերը շատ չի փոխվի։ «Ըստ նախնական տվյալների՝ «Ազատ հայրենիք» կուսակցությունը ստացել է 15 տեղ, որից 11-ը համամասնական, իսկ 4-ը՝ մեծամասնական համակարգով։ Այս կուսակցությունը իշխող է, այն ղեկավարում է ԼՂՀ վարչապետը։ Երկրորդ տեղում է Հայ հեղափոխական դաշնակցությունը՝ 7 մանդատով, որից 4-ը՝ համամասնական, իսկ 3-ը՝ մեծամասնական։ Իսկ «Արցախի դեմոկրատական կուսակցությունը», որը ղեկավարում է ԱԺ նախագահ Աշոտ Ղուլյանը, նույնպես ունի 7 մանդատ, որից 4-ը՝ համամասնական, իսկ 3-ը՝ մեծամասնական համակարգով»,- նշեց Մինասյանը։
Այսպես կոչված կառուցողական ընդդիմությունը՝ «Շարժում 88»-ը, նախնական տվյալներով ունի 2 մանդատ, որից մեկը Ասկերանի շրջանից Վիտալի Բալասանյանն է։
«Այս պահին դեռեւս պարզ չէ, թե Արցախի ներքաղաքական կյանքում նորահայտ «Ազգային վերածնունդ»-ը կհաղթահարի՞ 5 տոկոսի շեմը»,- նշեց քաղաքագետը՝ հավելելով, որ տրամաբանական կլիներ պահպանել «Ազատ հայրենիք», «Արցախի դեմոկրատական կուսակցություն» եւ ՀՅԴ եռյակ կոալիցիան։
Նշենք, որ համաձայն ԼՂՀ ԿԸՀ հենց նոր հրապարակած տվյալների՝ «Ազգային վերածնունդ» կուսակցությունը 5.38 տոկոս ձայներով ընտրվել է Ղարաբաղի խորհրդարան։
