Մեր նպատակը որեւէ պետության քաղաքական այդ համակարգում ներգրավելը չէ, այլ մեր փորձը փոխանցելը եւ հաջողությունները կիսելը: Այս մասին այսօր՝ մայիսի 4-ին, լրագրողների հետ հանդիպման ժամանակ նշել է ՀՀ-ում Լեհաստանի Հանրապետության արտակարգ եւ լիազոր դեսպան Եժի Նովակովսկին՝ անդրադառնալով «Արեւելյան գործընկերության» ծրագրին:
Նրա խոսքով, սխալ են այն մարդիկ, որոնք մտածում են, թե այդ ծրագրով փորձում են Ռուսաստանից պոկել այդ ծրագրում ընդգրկված երկրներին:
«Այդ ծրագիրը միտված չէ ընդլայնվելու թե՛ քաղաքական, թե՛ տարածքային առումով, այլ միտված է նրան, որ կարողանանք կիսել այն փորձը, որը մենք ունենք, որը ստուգված էր եւ կիրառվում է եւ վառ օրինակ է ներկայիս համար»,-ասել է նա՝ հավելելով, որ այդ ծրագրի մասին չպետք է խոսել անցյալով, քանի որ առաջիկայում Ռիգայի գագաթաժողովում նորից քննարկվելու են համագործության հնարավոր եզրերը: «Մեր նպատակն է հասնել նրան, որ առավելագույն սերտ հարաբերություն հաստատվի եւ Հայաստանը մոտեցվի Եվրամիությանը»,-ընդգծել է դեսպանը: Նրա համոզմամբ, Հայաստանի հետ ԵՄ քաղաքական համագործակցությունը հնարավոր է:
