Հայաստանում ընթացիկ տարվա հունիսին կկայանա Ցեղասպանագետների միջազգային ընկերության 12-րդ կոնֆերանսը։ Այս մասին մայիսի 4-ին կայացած մամուլի ասուլիսի ժամանակ հայտարարել է ՀՀ նախագահի աշխատակազմի ղեկավար, Ցեղասպանության 100-ամյակի միջոցառումները համակարգող պետական հանձնաժողովի ղեկավար Վիգեն Սարգսյանը՝ հավելելով, որ 2 տարին մեկ այդ ընկերությունը կոնֆերանսներ է անցկացնում աշխարհի տարբեր մասերում։ Առաջիկա կոնֆերանսին գրանցվել է մոտ 400 մասնակից։
Սարգսյանի խոսքով՝ Հայոց ցեղասպանության զոհերի հիշատակը հարգելն ու դրան նվիրված միջոցառումները ապրիլի 24-ով չեն ավարտվել։ «Այդ միջոցառումները կշարունակվեն մինչեւ եկող տարի ապրիլի 24-ը։ Մեր վեբ կայքը (http://armeniangenocide100.org/) կշարունակի աշխատել նույն ինտենսիվությամբ՝ նյութեր տեղադրելով աշխարհի տարբեր վայրերում կազմակերպված միջոցառումների մասին»,- նշեց Սարգսյանը։
Նա հավելեց, որ վաղը ՀՀ նախագահի ղեկավարած պատվիրակությունը կմեկնի ԱՄՆ, որտեղ Վաշինգթոնի Մայր աթոռի վանքում Ամենայն հայոց կաթողիկոս Գարեգին Բ-ի եւ Մեծի Տանն Կիլիկիո կաթողիկոս Արամ Ա-ի մասնակցությամբ էկումենիկ պատարագ կմատուցվի։ «Կցանկանայի առանձնացնել միջազգային երաժշտական MIDEM փառատոնը, որը հունիսին կկայանա ֆրանսիական Կաննում, որտեղ Հայաստանը ներկայացված կլինի պատվո հյուրի կարգավիճակով։ Փառատոնին հարգանքի տուրք կմատուցվի Կոմիտասին եւ Ցեղասպանություն վերապրած մեծ մտավորականի ժառանգությանը»,- նշեց նա։
Պետհանձնաժողովի ղեկավարը հիշեցրեց, որ օգոստոսին կկայանան համահայկական խաղերը։ «Սեպտեմբերին անկախության տարեդարձի միջոցառումները նույնպես հարուստ կլինեն։ Բացի այդ կկայանա Ցեղասպանության 100-ամյակի միջոցառումները համակարգող պետական հանձնաժողովի 6-րդ նիստը, որի ընթացքում կկայացվեն մի շարք կարեւոր որոշումներ»,- եզրափակեց Վիգեն Սարգսյանը։
