Մայիսի 1-4-ը Ցեղասպանության 100-րդ տարելիցի Կանադայի տարածաշրջանային վարչության հրավերով ՀՀ սփյուռքի նախարար Հրանուշ Հակոբյանը աշխատանքային այցով մեկնել է Կանադա՝ Հայոց ցեղասպանության 100-րդ տարելիցին նվիրված մի շարք միջոցառումների մասնակցելու, ինչպես նաեւ հայ համայնքի ներկայացուցիչների հետ հանդիպումներ ունենալու նպատակով:
Մայիսի 2-ին նախարարը հանդիպել է Մոնրեալի քաղաքապետ Դենիս Կոդերի հետ: Հրանուշ Հակոբյանը՝ ի դեմս Դենիս Կոդերի շնորհակալություն է հայտնել Կանադայի իշխանություններին երկրում հաստատված հայերի հանդեպ ցուցաբերած բարյացկամության եւ Կանադայի հանրային կյանքին ինտեգրվելու հնարավորությունների ընձեռնման համար: Իր հերթին Դենիս Կոդերը գոհունակություն է հայտնել կանադահայերի գործունեության վերաբերյալ, ովքեր դարձել են օրինակելի քաղաքացիներ եւ նպաստել երկրի զարգացմանն ու կանադա-հայկական հարաբերությունների ամրապնդմանը:
Նախարարն այցելել է Մեծի Տանն Կիլիկիո Կաթողիկոսության Կանադայի թեմի առաջնորդարան, հանդիպել թեմի առաջնորդ Մեղրիկ եպիսկոպոս Բարիկյանին, այնուհետեւ հանդիպում է ունեցել առաջնորդարանին կից Սուրբ Հակոբ շաբաթօրյա դպրոցի սաների եւ ուսուցիչների հետ:
ՀԲԸՄ Ալեք Մանուկյան ամենօրյա վարժարանում ՀՀ սփյուռքի նախարարը մասնակցել է կրթօջախի 45-ամյակին նվիրված տոնակատարությանը: Հրանուշ Հակոբյանը կարեւորել է կրթօջախի դերը մատաղ սերնդի հայեցի դաստիարակության գործում, որը մինչ այժմ ավելի քան 1500 շրջանավարտ է տվել, այն հիմնադրվել է 1970թ. ազգային մեծ բարերար Ալեք Մանուկյանի եւ Արշավիր Գյոնջյանի ջանքերով, այսօր այն ունի 350 աշակերտ եւ 48 ուսուցիչ:
Մայիսի 3-ին ՀՀ սփյուռքի նախարարը Մոնրեալի քաղաքապետ Դենիս Կոդերի եւ Կանադայում ՀՀ արտակարգ եւ լիազոր դեսպան Արմեն Եգանյանի հետ մասնակցել է դեպի Place Des Arts հրապարակ Հայոց ցեղասպանության 100-րդ տարելիցին նվիրված կանադահայության կազմակերպած քայլարշավին, որին մասնակցել են շուրջ 10 հազար մարդ: