Իսպանիայում ապօրինի միգրացիայի հարցերով զբաղվող հանցավոր ցանց են բացահայտել: 80 մարդու կալանավորել են՝ չինացիներին ապօրինի ճանապարհով Մեծ Բրիտանիա, Իռլանդիա, Կանադա եւ ԱՄՆ ուղարկելու կասկածանքով:
Փաստաթղթերը պատրաստել են տուրիստական տարբեր գործակալություններ, որոնք ղեկավարել են ծագումով չինացիներ: Ներգաղթյալներին այլ վայրեր են ուղարկել Բարսելոնայով:
Հանցագործներն իրենց զոհերին գտել են Չինաստանում, առաջարկել ուղարկել ցանկացած երկիր՝ դրա համար գումար պահանջելով: Օրինակ՝ Մեծ Բրիտանիա մեկնել ցանկացողները պետք է 20 հազար եվրո վճարեին:
Ըստ ՌԻԱ Նովոստիի, արդեն Եվրոպայում ներգաղթյալներին Բարսելոնայի շրջանի տարբեր քաղաքներ են ուղարկել, ինչից հետո նրանցից վերցրել են փաստաթղթերն ու խիստ հսկողության տակ պահել: Կեղծ փաստաթղթերի ձեւակերպումից հետո ներգաղթյալներին նշանակման վերջնական վայրեր են ուղարկել:
Խուզարկության ընթացքում տարբեր պետությունների 170 կեղծ անձնագրեր են հայտնաբերել, Շենգեն համաձայնագրի, Ավստրալիայի, Մալազիայի եւ այլ երկրների կեղծ կնիքներ, տարբեր երկրների արժույթ, բջջային հեռախոսներ:
