Աշխարհի խոշորագույն սոցիալական ցանցը՝ Facebook-ը, նախատեսում է արդեն այս ամիս իր նորությունների ցանկում տեղադրել նաեւ BuzzFeed-ի, The New York Times-ի, National Geographic-ի եւ այլ պարբերականների տեսանյութերն ու լուրերը:
Այդ հրապարակումների հիմնական առանձնահատկությունն այն կլինի, որ բովանդակությունը Facebook-ում կտեղադրվի ամբողջությամբ եւ առանց ընդգծված հղումների:
Ըստ The Wall Street Journal-ի, բազմաթիվ պարբերականների համար Facebook-ում իրենց նյութերի հղումը թրաֆիկի հիմնական աղբյուր է դարձել: Սակայն բջջային սարքավորումներում այդ հղումները բացելը մինչեւ 8 վայրկյան է տեւում՝ հաճախ հիասթափեցնելով օգտատերերին:
Կայքերի թրաֆիկի կորուստը փոխհատուցելու համար Facebook-ը լրատվամիջոցներին առաջարկում է կիսել գովազդից ստացված եկամուտը:
Շատերին, սակայն, մտահոգում է նման ինտեգրումն ու կախվածությունը Facebook-ից: Համաշխարհային խոշոր լրատվամիջոցներին անհանգստանում է նաեւ այն, որ Facebook-ի համար հասանելի կլինի իրենց վիճակագրությունը, եւ սոցցանցը կկարողանա դրանք օգտագործել սեփական շահերի համար:
