ՀՅԴ Արցախի Կենտրոնական կոմիտեն հանդես է եկել հայտարարությամբ, որտեղ նշել է, որ ՀՅԴ-ն ավելի մեծ կազմով է ներկայանալու ԼՂՀ 6-րդ գումարման ԱԺ-ում ՝ դառնալով խորհրդարանում գործող 2-րդ քաղաքական ուժը:
Հայտարարությունում ասվում է.
«Ս.թ. մայիսի 4-ին տեղի ունեցավ ՀՅ Դաշնակցության Արցախի ԿԿ-ի նիստը, որի ընթացքում քննարկվեց 2015 թվականի մայիսի 3-ին կայացած ԱԺ ընտրությունների արդյունքները: ՀՅԴ Արցախի ԿԿ-ն հաստատեց.
1. ԼՂՀ 6-րդ գումարման ԱԺ ընտրությունները պետք է համարել առաջխաղացում մեր երկրում ժողովրդավարության սկզբունքների արմատավորման եւ պետականության կայացման գործում: Դրա վառ ապացույցն ընտրություններին մասնակցած 7 կուսակցություններից 5-ի նվազագույն շեմի հաղթահարումն է:
2. ՀՅԴ Արցախի ԿԿ-ն իր երախտիքն է հայտնում շուրջ 13.000 այն քաղաքացիներին, ովքեր վստահելով ՀՅ Դաշնակցությանը՝ քվեարկեցին «Խաղաղություն, արդարություն, աշխատանք» կարգախոսի օգտին:
3. ՀՅԴ Արցախի ԿԿ-ն համոզված է, որ երկրի կառավարման քաղաքական պատասխանատվությունն իր վրա կվերցնի մեծամասնության քվեն ստացած քաղաքական ուժը:
4. Ընտրությունների արդյունքներից ելնելով՝ ԿԿ-ն փաստում է, որ ՀՅԴ-ն ԼՂՀ բնակչության կողմից համամասնական ընտրակարգով շուրջ 20 տոկոսի քվեն ստանալով եւ ունենալով 3 մեծամասնական կարգով ընտրված պատգամավորներ՝ ավելի մեծ կազմով է ներկայանալու ԼՂՀ 6-րդ գումարման ԱԺ-ում ՝ դառնալով խորհրդարանում գործող 2-րդ քաղաքական ուժը»: