Այսօր՝ մայիսի 5-ին, լրանում է Սահմանադրական փոփոխությունների վերաբերյալ առաջարկներ ներկայացնելու վերջնաժամկետը: NEWS.am-ի տեղեկություններով՝ Սահմանադրական բարեփոխումների մասնագիտական հանձնաժողովին իրենց առաջարկներն են ներկայացրել Հայ հեղափոխական դաշնակցությունը, նախկին վարչապետ, ՀԱԿ պատգամավոր Հրանտ Բագրատյանի «Ազատություն» կուսակցությունը, ՀՀԿ-ական պատգամավոր Արտաշես Գեղամյանի «Ազգային միաբանությունը» եւ նախկին ՀԱԿ անդամ, Անահիտ Եղոյանի գլխավորած «Հայոց հայրենիք» կուսակցությունը:
Մեր աղբյուրները հայտնեցին նաեւ, որ շաբաթվա վերջին Սահմանադրական բարեփոխումների մասնագիտական հանձնաժողովը կգումարի հերթական նիստը, կորոշեն հետագա անելիքները, գրաֆիկը, կքննարկեն կուսակցությունների առաջարկները: Սահմանադրության առաջին երեք գլուխների վրա աշխատանքն արդեն հիմնականում ավարտել են, այժմ սկսելու են աշխատանքը մնացած գլուխների վրա, հիմնականում՝ կառավարման համակարգի հետ կապված: Առաջարկներից եւ քաղաքական կոնսուլտացիներից պարզ կդառնա՝ կներկայացվի հայեցակարգի մեկ, թե երկու տարբերակ: Մեզ հայտնի դարձավ նաեւ, որ հանձնաժողովը բարեփոխված սահմանադրությունը հանրությանը կներկայացնի օգոստոսին, նախատեսվում է նոյեմբերին էլ անցկացնել հանրաքվեն:
