«Ազգային վերածնունդ» կուսակցությունը ԼՂՀ Ազգային ժողովում ներկայացնել է ԱՎԿ նախագահ Հայկ Խանումյանը:
Ինչպես տեղեկանում ենք կուսակցության մամուլի ծառայությունից, քարոզարշավի ժամանակ կուսակցությունը կարեւորել է տնտեսական եւ քաղաքական ապակենտրոնացումը: Սա հատկապես վերաբերվում է համայնքներին: Կուսակցությունն առաջարկում է Արցախի գյուղական եւ քաղաքային համայնքների ռեսուրսների ավելացում, շրջվարչակազմերի լիազորությունների կրճատում եւ դրանց պատվիրակում համայնքներին: Կուսակցության առաջարկած մեխանիզմները թույլ կտան համայնքի բնակչին իր հիմնական խնդիրները լուծել հենց համայնքի ներսում:
«Ազգային վերածնունդ» կուսակցությունը ստեղծման պահից, 2013թ. ի վեր հանդես է գալիս որպես ընդդիմադիր կուսակցություն եւ հասարակության ուժեղացման տեսանկյունից կարեւորում հզոր ընդդիմության առկայությունը: Սա հատկանշական է Արցախի ներկա քաղաքական իրողությունների պայմաններում, երբ 2010թ. ձեւավորված Ազգային ժողովում ոչ մի ընդդիմադիր ուժ չկար: Հասարակության ուժեղացման գործում կուսակցությունն իր վրա է վերցրել քաղաքական համակարգի որակների բարձրացման խնդիրը:
Արտաքին քաղաքականության ոլորտում կուսակցությունը քարոզարշավի ժամանակ խիստ քննադատության է ենթարկել գործող իշխանություններին` Իրանի հետ հարաբերությունների բացակայության համար: Կարեւորելով Արեւմուտքի եւ Ռուսաստանի հետ առկա հարաբերությունները` կուսակցությունը մեծ տեղ է հատկացնում հարեւան Իրանի Իսլամական Հանրապետության հետ սերտ առեւտրատնտեսական եւ քաղաքական հարաբերությունների ստեղծմանը, տարբեր հարցերի շուրջ բարձր մակարդակի խորհրդակցություններին: